🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🍇الفصل 30 : بعد الشدّة🍇

الحمد الله 💜💜 البارتات نجمت نرجعهم ومشكورين الناس الكل ع التفهم 😘

                  ✴✴✴🍇✴✴✴

لف اكتافو بالبرنوس وفرك كفوفو فماش ما يدفيهم ،وقفت قدامو حذامي وقعدت مثبتة فيه تستنى يركح باش تسألو  ،تبسم ومد يدو ليها ،جبدها وقعدها بجنبو و زيد حل اطراف البرنوس ودخلها  في وسطو ،تململت وحاولت تبعدت عليها "يوسف !!...هبلت؟! ...نحي عليا "

تبسم بخباثة وهو رامي ذراعو على اكتافها باش يمنعها ماتتحركش" خلينا ندفو بعضنا "

ضمت شفايفها ولمعت عينيها بغل ...هذا يسيب في الريق متاعو وموش ناوي يخليها رايضة ...وزيد ماعلى بالو بعينين الباقية ايلي كلاتهم ماكلة ،صرت سنونها وهي تاقف وتنحي عليها البرنوس ،في نيتها حبت تطمن عليه اما هو كيف العادة مفددها ببلادتو ...هربت من بحذاه وجات حذى راييس وقعدت وزيد حاولت ماتخزرلوش لانها متأكدة بايلي عينيه  مغروسة فيها ...تبعهم ابراهيم وركز في كل حركة يعملوها ...تأكد ايلي هي مرا ...وتأكد زادا بطول المدة ايلي قعدوها في ااجبل ايلي بينها وبين يوسف فمة حكاية ...والف بالماية يعرف حكايتها وموش بعيد يكون هو عندو يد في دخولها لفم  ،لكن كل ما يشوفهم قراب من بعضهم يحس بالسخانة تمكنو ولا شعوريا ينفر من ولد الشادلي ،كيف ايلي يحسو زير نساء و مخو موش نظيف وفرد وقت هو يلوم عليها كيفاش بنية بهاك الحشمة والتغنيج تتصرف هكاكا معاه وما تخليش مسافة بيناتهم ...

قريب منو كان صياد قاعد وفي يدو طرف قماش ينظف فيها في سلاحو ويلمّع فيه ...بالو مشغول وعقلو سارح مع الغزالة ايلي وراء الحد ...عينيها ايلي صابت قلبو ودخلتو في دوامة وين يتلفت يلقى وجها قدامو ...لكن ما باليد الحيلة ...هي بعيدة وبيناتهم بر  كامل ، منّى قلبو وعقلو انها هي زادا تخمم فيه و مازالت تتفكر الملڨى متاعهم ...قبل مايزيد يسرح معاها قص عليه صوت محمود وهو يدخل من فم المغارة " باش نرجعو للاكاديمية غدوة ...ايلي صار هوني يتمسح من بالكم... واضح "

بصوت واحد " واضح "

لوى يديه وراه خزرلهم واحد واحد " ابتداء من تو باش تكون تدريباتكم قاسية اكثر  ...قاسية لدرجة انو  الموت ايلي شفتوه المرة هاذي يكون ارحم وبياسر ملي يستنى فيكم ...وبعد ها التدريبات باش نبدا نعطيكم في المهمات التي جمعتكم على خاطرها ...في الوقت الحالي انتوما تكفو ...لكن اكيد في الشهور الجاية باش ينضافولكم اخرين ...ايلي  روحو عزيزة عليه و يخاف من الموت ...وايلي يعرف قلبو رهيف وماينجمش يحارب على ارض تونس وماعندوش القدرة يضحي بالغالي والرخيص على خاطرها...وايلي يعرف روحو باش يضعف و يفضح ايلي باش نعملوه...يقلي من تو ...ينجم ينسحب ... ندربو كضابط عادي وماتكونش بيني وبينو حتى صلة اخرى ...بالمقابل...لازم تعرفو انو ها المهمات صعيبة واكثر ملي تتخيلو ،تسعين بالمائة تموتو فيها ...و مالازمش تتشدو اسرى ...وفي صورة ما صار هذا ...الفم لازم يقعد ساكت ...حتى لو متو تحت التعذيب...نحب ايلي يقول انا مستعد ...يكون حب بلادو فوق اي حب بقلبو ...حب اكبر بياسر حتى من الام ايلي جابتو ...يكون بايع روحو وشبابو في خاطر الاستقلال و الحرية ..."سكت باش يشوف تأثير كلماتو عليهم و وقت لقاهم جامدين ويتبعو فيه بانتباه سألهم "وتوا شكون باش يكون معايا !؟ "