🌺حب تحت حكم الفلاڨة🌺
💚🌿🌿💚
لمعت الحربة تحت ضوء الڨمرة وزادت لمعتها وقت حركها وقلبها ...تمتم بكلماتو " "الخيبة ايلي شفتها في عينين الكابيتان ...والامل ايلي شفتو يتبخر من خزراتو حرقوني من غير ما يخلفو رماد ...ورب العرش...وايلي خلق ها الجبال وسواها ...وعزة العلم ...لو ما خليناش ها الجنود يرجعو منين جاو ...ها الحربة حلال عليها رقبتي ..."
كان متوقع حكاهم بينو وبين روحو...لكن طاهر سمعهم ...ربت على كتف يوسف متضامن ...وحاسس بالنار ايلي شاعلة في جواجيه ...طبيعي يحس بيه ما هو زادا مكوي من نفس النار .
هبطو الفرسان صف واحد من علوة الجبل ...مشاو بنظام و ترتيب الفارس جنب الفارس ووراء الفارس ،
تكلم راييس و حماس الحرب ماخذة عقلو " غني ها حامد...في العادة صوتك حافل ...والا مفجوع وخايف من الموت؟! "
ضحك حامد " واش حاب تسمع ڨولي ها ولد الدشرة "
جاوبو واحد من آخر الصف " ياريت تفكرنا بهاك الطير ايلي حوم في السماء كنت تغنيهالنا ايام التدريب "
محمح حامد و سرح صوتو بموال حزين زادت بحتو حيرت محاين سامعها "
💜 " يا طير الموووت ...خبر لميمة
يااا و فات الفوت...وماعاد نلاڨييييييها
هز جوابي وطييير ...علي بجناحك
تكتبلي نموووت ...غريب على عينيييييييها 💜
💜ياطير الموووت ...خبر لوليييييييفة
ماتستنى رجووووع ...ماعادش ليييييها
ياطير المووووووت
هز كلامي وعلي ...
خفڨ بريشكك نا ماااعاد نولي ...💜
ضرب صياد بمڨرونو على سرج حصانو بحماس وغنى معاه فرد صوت "💜 يا طير الموووت ...خبر رفيڨي
طير وعلي لفووووڨ ...ماتشوي ڨليبي
نعرف حر المووووت ...ومعنى فراڨ حبيبي
ياطير المووووت...نكتبلك بدمي
لو صاحب الروح...خذاها مني
شهييييد نموووت ...وينزاااح همي "💜
ضرب عبد الرحمان مڨرونو بحزامو عمل صوت رنت معاه الرصاصات وغنى ها المرة بحماس "كسر الحجر"
غنو البقية وراه فرد صوت وهوما يضربو صدورهم " اضرب بارودك
اكتم السر
ماتجيب خبر "
تبسم ابراهيم و غنى عمر في بلاصتو بحماس " دم الشهيد
حنضل مر "
غنو وراه بصوت واحد بنغمة عسكرية متسارعة " ليلي خانونا...وايلي خلونا ..
ليلي كرهونا ...وايلي قهرونا
بدم الشهيد... تقوى همتنا و تحيا تونسنا ..."
صاح يوسف وهو يهز سلاحو لفوق 💛"تحيااااا تونسنا "💛
💚🌿🌿💚
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
مغامرة⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
