كيف ماقالتلها أسينات ...نظفت الطاولة مليح وركحتلها نابها وزينتها بما لازمها ورجعت لكنتوارها ....شهقت وقت دخل هاك الراجل المتوسط في الطول شعرو البني القصير هابط دوبلاش على جبينو ...قرب منها بخطوات مربوثة ووجهو احمر طمطومة ...عينها وساعو وهي تحط في يدها على فمها من الدهشة "حذااااامي ....شنوة ايلي عملتو في روحك "
تنهدت وهي تبلل في شفايفها بريقها "اعطيني كاس ماء"
قعدت تبحلق فيها موش مصدقة كيفاش بدلت روحها من مرا بكامل انوثتها لراجل ماتنجمش تغلط فيه رغم كل شي فيها يرمز للمرا " علاش هكا ...انت رميت روحك في النار ...بجدك تو باش تدخل للاكاديمية ...والله لو يشلقو بيك الا مايقتلوك ...تفهم ؟!....يقتلوك ...باهي نقولو ماخممتش في روحك ...ع الاقل خمم في بوك وامك ...لو تجرالك حاجة يجرى فيهم "
مطت شفايفها ماتحبش تسمع شي"بية !...يعيشك توا زايد ها الحديث انا توا ضابط في الاكاديمية وباش ندخل نتدرب ...وفى "
عقدت حواجبها "باهي ...قلي ع القليلة ...كيفاش نجمت تنجح ...كيفاش عملت ....نرمالمون فمة طبيب ...كيفاش عداك "
قعدت ساكتة لحظات ومن بعد خزرت بعيد "تعدى واكاهاو ...المهم توا ...انا وصلت ليلي حبيت عليه "
حاولت من جديد تقنعها "يعيش اختي يا حذامي ...لو تعمل في هذا الكل على جال خوك ...نقلك راو مستحيل يكون فرحان وهو يرى فيك ترمي في روحك في النار "
نفخت بقلة صبر "بية...وفى ...مانحبش نزيد اناقش في هذا ..ورد بالك تعيطلي بحذامي مرة اخرى ...انا حاتم....من اليوم تعيطلي كان حاتم ..."
حركت راسها واكتافها رافضة الفكرة " والله الحكاية صعيبة عليا ..."تفكرت باش تسألها حاجة ضرورية " هي وامك وبوك شنوة قلتلهم ...يعني كيف باش تدخل تدرب اكيد باش تغيب ع الدار وتبات لبرا ...."
"قلتلهم باش نتعلم الخياطة ..."
نفخت "اوووف حذامي مالا خماضة حليتها " حطت راسها بين كفوفها "كيفاش باش تنجم تسلك روحك وانت بين مائتين راجل ...مانجمش نتخيل اصل "
ضربتها على كتفها "فك عليك من التخيلات وهات كاس ماء ريقي شااااح راو "
رمات المعنى عليها "عاد انت صرفت صرفت. ..قول نصبلك كاس واكاهاو "
⭐✴✴⭐
شخصية الراجل جديدة عليها ...وصعيبة انها تمثلها ...لكن باش تخلد اسم خوها وتحققلو حلمتو فهي مضطرة تكون راجل في عوض مرا ...كبست على يد الفاليجة ايلي هازتها وهي تخزر لبوابة الاكاديمية ...كبيرة على طرفين ...
مصنوعة من حديد صافي ومتين ...خزرت للبنية الواسعة والقديمة وقلبها يضرب في المائة ...من اليوم ...باش تتبدل بارشا حاجات في حياتها...صوت تڨربيع متاع حاجة حديد طاحت خلاها تتلفت وراها تشوف اش فمة ...خزرت لقاتو طفل تقريبا في عمرها. ..قمحي و شعرو قصير بارشا ...هاز صاك على ظهرو وزوز فاليجات في يدو ...تبسملها وهبط يهز في الطنجرة ايلي طاحت منو ، وقت ايلي طبس لوطة تفرتتلو الفاليجات ،تمتم وهو يلعن في الشيطان "ياربي علاش هكا "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
