يفرك في يديه بعصب ...وقدامو عمر يدادي كيف المجنون ...وطاهر واقف في الوسط مازال موش فاهم شي ...سأل الف مرة شنوة فمة...حبهم يفسرولو حتى شوية ...اما لا حد فيهم تكلم ...ابراهيم بطبيعتو سكوتي ...وعمر مازال تحت الصدمة حتى يفهم هو باش يفهمو...هاك الليلة كانت صعيبة ...عليهم ...على الناس الكل تقريبا ...وماوفى الليل كان ماارواحهم طلعت وخلوقهم فدت ...يوم جديد....تعدى بعدو يوم واثنين وتلاثة ...والحال هو هو ...ماتبدل شي فيه ...لكن بالنسبة لحذامي ...حتى حاجة ماقعدت على حالها ...اول ماحلت عينها ولقات روحها في السبيطار ...مكنها الخوف ...وكتبت بارشا سيناريوات في مخها ...اولهم انو اكاديمية كاملة ولت تعرف حقيقتها ...والدليل لبستها متاع النساء...شعرها المغطي ومكبوس بمحرمة صغيرة ...الطبيب ايلي يعامل فيها ويخاطب فيها كيف النساء موش كيف الرجال ...فكرت في الهروب كحل لها القصة لكن بايلي حاولت مانجمتش ...كانت فمة مراقبة عليها بصيفة غريبة الشي ايلي عزز شكها ...نهار وطولو وهي ممدودة ع الفرش لين جنابها طابت ...كل مرة فرملي والا طبيب يجي يتفقدها ...ملت وكلت والفضول ماخلاش في عقلها بلاصة باش تخمم في طريقة تسلك بيها روحها من فم ...غلبتها طبيعتها كمرا ...وبكات بقلة حيلة ...عيات وهي تمخط ...ترقد ليلها تبكي وتقوم صباحها تبكي ...النهار الوحيد ايلي تبسمت فيه هو النهار ايلي جات فيه بية تطل عليها ...ترمات عندها و عنقتها بلهفة وفرحة تقول هبطتلها من السماء"بية !؟...الحمد الله جيت...والله متت هوني "
طبطبت بية على ظهرها "انا ديما معاك ...واللطف عليك من الموت " سكرت بونيتها وضربتها بيها " قتلك رد بالك...قتلك سايس روحك ...نبهتك من عمايلك ...كنت متأكدة باش يجي نهار ويجرالك هذا"ضربتها مرة اخرى "صححت راسك وماسمعتنيش"
بعدت حذامي عليها شوية "بية ...كيفاش سمعت ...شكون قالك ...ومنين عرفت انا وين ..."
تبسمت وهي تتلمس في خدود حذامي" مدام أسينات... "
تلعثمت "م....مداااام ...أ....أسينات !؟؟.".. متاع الكازينو ...ايلي نعرفوها احنا الزوز "
"اييييه ...هي ...وزيد نقلك هي ايلي جابتك لهوني"
حطت كفوفها على نواظرها فماش ما تستوعب الحكاية...هي اخر مرة تتذكر كانت في الاكاديمية وعمر هازها للطبيب...كيفاش وصلت ليدين أسينات ..فرضية وحدة مافماش غيرها ...محمود ...هو ايلي وصلها لفم...وساعت عينها على كبرهم...وحلت فمها مصدومة...صرفڨت روحها بكف "الكااابيتان ....عرف ...كل شي!!!!!!..."
قرنت بية حواجبها موش فاهمة تهثريب صاحبتها " فاش تخرف ؟!"
غمضت عينيها و كبست صوابعها على غطاء شعرها " مصييييبة ....مصيبة وطاحت فوق رااااسي يا بية ...كل شي مشى خسارة...كل شي تبخر وضاع ...حلمتي وحلمة حاتم ..."
شحب وجه بية " حذااامي ...يعيشك ماتخوفنيش وماتحكيش بالالغاز والكلام الموش مفهوم ...."
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
