🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🍀الفصل السابع : محمد 🌸زينة🍀

حرك كرومتو يمين يسار لعل ينحي شوية تعب ...نحى شلاكتو وتمد على فرشو ...تنفس براحة وهو يحس في بدنو بدا يترخف...صوت الباب وهو يتحل حلاه يحل عينو ويخزر ليلي داخل ...وكيف لقاه طاهر ...نفخ بقلة صبر " ياخا موش قتلك نحبش نراك ...لواه راجع ...عامل بلعاني "
دز ابراهيم الباب وحلو على كبرو ...وكيف شافو لاخر...تنطر جاء واقف " برهوووم...شتعمل هوني"
حط ابراهيم يدو في جيوب سروال الزي وخزر لطاهر " اناهو فرشك ؟! "
شاور بصبعو يخوف ع اليمين وين كانت جراية السرير منحية غلافها وماقعدلو كان ملحفة ...اما الباقية فسي السيد لاخر فرشهم وتغطى بيهم ...قدم ابراهيم وجبد البطانية ومعاها المخدة ...مدهم لطاهر  باش يعاود يفرشهم لروحو ...ورجع وقف مقابل لاخر" شنوة صياد....يظهرلي ها الصنعة ما تطلعش عليك ...من كل عقلك اتبع في طفل صغير ؟...ماتحمشش على روحك !"
عداها بضحكة وهو يرتب في السيرة " ياولدي نفذلك معاه ...ههه شايخ عليه ...نحب نكبسو وبرا "
هزو وحطو " اذا عمتلو حاجة مرة اخرى حتى تفذليكة ماسطة ...باش نتحاسبو احنا الزوز ...يعني بمختصر الحديث ...اذا يا صياد تعديت على حق طاهر ...باش تلقاني في وجهك "
حمار وجهو " صلي ع النبيى...ياولدي نفذلك ...باهي ماصار شي وكيف هو مايحبش الفذلكة...معادش ندور بيه ..."خزر لطاهر "موش هكا يا فزغول...قصدي ...يا ولد......يااا ...راجل " تبسم لابراهيم وخزرلو لعل يشوف منو هزرة متاع رضا اما ابراهيم طفاه وتلفت لطاهر " اي حاجة تصير معاك تجي وتقولهالي ...ماتخبي عليا شي ورد بالك تخاف من واحد ..."
لمعت عينين طاهر وتبسملو بمودة...شاور براسو باهي وفرك صوابعو وهو يتمد على فرشو ويجبد بطانيتو على بدنو ...دار ابراهيم خارج وقبل مايجبد الباب وراه تمنالو ليلة زينة وڨحر لصياد بڨحرة ليها الف معنى.
                    ⭐♥⭐♥⭐
زوز كماين كبار معبين بعسكر فرانسا ومعاهم جيب صغيرة  وقفو  على حافة واد صغير ...على الحافة  المقابلة كانت فمة ديار مبنية بالحجر والطين ...ومن الحالة متاعهم كان  باين الفقر وقلة الحيلة متاع اماليهم ...هبط الكماندا مانويل من الجيب ونڨزو وراه قريب العشرة جنود الكل بسلاحتهم ...وقفوا وراه وخزرو لوين يخزر ...زم شفايفو وعقد حواجبو وقعد ساكت لحظات،تمتم(بالفرنسية ) "عروق تونس ...عروق تونس ...شكون ها *** ال يلي مسمين رواحهم عروڨ تونس وقاعدين يلعبو بأعصابنا "
شاور بصبعو لواحد من الجنود باش يقرب منو ...تسنتر الجندي وكبس روحو قدامو ...خزرلو مانويل على جنب(بالفرنسية ) "ماتخليلي حتى  ذكر في ها الديار ...كبير والا صغير جيبهملي ...ليوم ...لازمني نعرف ...شكون "عروڨ تونس" هاذم ...بعد ماقتلو زوز من جنودنا و هزولهم سلاحتهم في ها الواد ...فرانسا مستحيل تنسى حق اولادها ...هوما ايلي  عملو ها العملة ...وانا ايلي باش نحاسبهم "
حرك الجندي راسو  بمعنى تسلم المأمورية وهز يدو باش يعطي اوامرو ليلي معاه ...هبطو عشرة اخرين من الكماين وهرولو شاقين الواد  ناحية الديار ...ومانويل واقف بكل اريحية مشيع عينيه لوين الحجر اامبني ...نهارين لتالي ...زوز جنود تقتلو ...وتفكت سلاحتهم  وصبابطهم ...وزيد تحطت ورقة صغيرة على جثثهم مكتوبة فيها كلمتين " عروڨ تونس " ....ماهيش اول مرة تصير عملية كيف هكاكا صارت قبل وديما فمة هاك الورقة  ...الشي ايلي خلى نار الفرنسيس تزيد تشعل ...خاصة انو مالقاوش حتى خيط يوصلهم لها الجماعة ...