✴✴
صاح مانويل وهو يضرب الطاولة بساقو يقلبها " ضباط كبار من المظليين ومانجمتوش تقتلووووو واحد برك"
لهث الجندي ايلي قدامو وهو نازل بكفوفو على صدرو وبالسيف ما يتنفس" ماهوش طبيعي...القوة ايلي عندو ماريتها عند حد قبلو...كان وحش...موش بشر..."
خزرو بمحقرانية " وحش ؟!!...انتوما الفاشلين وهو مجرد شخص كرطوشة وحدة تكفي باش تنهيه ...في الوقت ايلي نجمت نحصرو ونثبت انو خاين فلتوه من يديكم ..."
بايلي باش يحكيلو وباش يوصفلو مستحيل ينجم يقنعو ولا ينجم يخليه يحس بعظام صدرو ايلي مشات رماد ...بعد الضربة ايلي حس بيها تكسرلو ضلوعو ...عجز حتى باش يهز سلاحو ويكمل مهمتو ...تسلسب في الوقت ايلي كان فيه محمود في مواجهة مع البقية وهرب يجري من غير مايتلفت وراه ...جرى بعيد وعلى اول جيب عسكرية عرضتو حبسها وطلع معاها و خلاهم يوصلوه لفم ...لكن مانويل ماعجبوش هذا الكل وقعد يلوم فيه ويعاود
" كومندان ...ها الراجل موش اي عدو ...ها الراجل وحدو جيش واذا بالحق قاعد يدرب في الضباط بهدف ثورة علينا ...تخيل كيفاش باش يكونو وهو صانعهم بيدو ...من الاكيد خسارتنا باش تكون كبيرة "
ڨحرلو مانويل على جنب "خااايف منو ؟! خايف وانت مظلي مشارك في اشهر المعارك "
كح ومع كحتو خرج رذاذ دم " موش خوف...اما ...اذا ماقتلناهوش فيسع ...باش نكونو في مشكل كبير"
كبس سنونو ونفخ بقوة ،جبد التاليفون ايلي بجنبو وخذى نفس طويييل قبل ما يتكلم" الكابيتان محمود ...وين ماكان تجيبوهولي حي والا ميت ...وزع الجنود في البلايص الكل ...خاصة الاكاديمية ...دارو وديار الناس ايلي عندو صيلة بيهم ...ماتغرب شمس ليوم الا وهو بين يدينا "
💚✴💚
تلمس الشابو ايلي على راسو وهو يخزر يمين ويسار فماش حد شافو والا خلط عليه من بعد خزر لمحمود ايلي واقف مقابلو " تنحي ها الزي...وتخلط ع الرجال في الجبل ...غادي تلزمنا ونستحقو خبرتك "
" وضباطي ومرتي ؟!..."
"مرتك في الحفظ والصون وهي مع حريمنا ...وضباطك اذا نجمو يوصلولهم وحسينا انهم في خطر ...باش نخلطوهم عليك اكيد...ايلي خدم ها البلاد مستحيل البلاد تسلم فيه ....اما توا اطلع للتران وفي فاڨونة فارغة بدل حوايجك اهبط في اخر محطة وغادي تلقى جماعتنا يكملو معاك...الاكاديمية صفحة وطويناها "
فاتو بخطوتين ومن بعد دارلو و مسد على كتفو " محمووود ...فخورين بيك ...الوطن فخور بيك"
تبسم فوق من قلبو ...وحط البيرية على راسو ويدو في جيابو وتعداه ...خرج من الزنقة هاكي وزرب في خطواتو على طول الطريق لين وصل لمحطة التران ايلي من المفروض يطلع منها ....استنى لين يهبطو منها المسافرين وعينيه من بلاصة لبلاصة تدور تشوفش حد يلوج عليه ...في اي لحظة ينجم يوصل الخبر للعسكر ويشدوه ...شد في حديدة الباب باش يطلع لكن اخر مسافر هبط من الباب ايلي من بعد خلاه يتجمد في بلاصتو ...تحرك التران وتملصت صوابعو وقعد هو واقف ويدو ممدودة للفراغ ...بعد عشرين عاااام ...حسبهم بالشهر وباليوم ...وحتى بالسوايع ...شاف الراجل ايلي أمن عندو بنتو ...راجل خالتها ايلي وصاه وقتها يستحفظ عليها ويحطها في عينيه ...الراجل ايلي يعرف بنتو وين ...شافو يبعد ويدخل وسط الزحمة مع العباد ...من غير الممكن يفلتو ...ولا يسمحلو يبعد وتبعد بنتو عليه من جديد... خلط وراه وهو يجري ،كل مرة يتسطع في واحد والا يدزو باش مايعطلوهوش وبما انو بزي ضابط فرنساوي فحد مانجم يحتج ولا يقلو كلمة ...مد يدو الطويلة وجبدو من كتفو بقوة دورو ناحيتو ....شهق الراجل مرعوووب وللحظة حس بمنيتو جات وقت شاف الزي و النجوم ايلي في كتفو ...لكن ...وقت شاف الوجه نطق لسانو بصدمة
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
