🌺حب تحت حكم الفلاڨة🌺
💚🌿🌿💚
دقات متمردة ...متسارعة ...قوية ضربت على ضلوعو...مع لهيثو وهزات صدرو لقى صعوبة يخزر بعيد ويفرق الوجوه ...وزادت بيه وجيعة كتفو وجرحو ايلي ينز...لكن هي ...عرفتو ...ومن بين هاك التلاثة لقطتو ...عين ع العدو تضرب رصاصة وبين الحين والحين تعمر سلاحها تهز عيونها فيه وتخزرلو ...قالهالها مرة وهي مانساتش """ الفارس ابراهيم الڨايد """... لكن شبيه الفارس موجوع وذراعو مخضبة باللون الاحمر...عقدت حواجبها و سطر الخوف في داخلها ...تسلسبت قريب لاسينات وقدمت معاها بنفس النسق متاع خطواتها " واحد من الفرسان جريح "
جاوبتها اسينات وهي تطيح لوطة وتجبدها معاها " ابراهيم هو المجروح ..."
تفقدت فاطمة حزامها وعدت عينيها على عديانها ايلي ماشين ويوخرو قدام كرطوشهم ايلي ما رحمش" معايا الدواء ايلي عطيتهولي ...نهزهوله "
ضربت اسينات رصاصة قبل ماتحكي" كيفاش باش تنجم توصلهولو.."
زحفت حذامي قريب منهم " انا نحمي ظهرها "
حلت اسينات صرة من الجلد مخيطة جديدة كانت معقودة على ظهرها ومدتها لفاطمة " قلهم يرتاحو و يشربو شوية ماء ...وشوية تمر...ليالي ماذاقو ولا شربو شي...وقت ينسحبو تو نخلط عليكم انا والبقية "
ركزت فاطمة على ركبتها وتبعتها حذامي وهي تشد ظهرها ...وفرد وقت هبطو يجرو لوين الفوسي ...نڨزت فاطمة بخفة جات مع هاك التلاثة...وماطولتش حذامي ونڨزت بدورها ...استقبلتها ذراعات يوسف وهي عنقتو بقوة ردتلو روحو وروحها ...تحسست وجهو بين كفوفها ومسحت الغبرة ايلي عليه باكمامها " ارتاحو شوية ...ردو النفس تو البقية يعوضوكم "
قربت فاطمة من ابراهيم ورجفت شفايفها وصوابعها بخوف "ابراااهيم..."من غير لا تشعر حطت يدها على جرحو ونزلت بكفها عليه لعل يكف الدم ...لا اراديا يدو تحطت على يدها ونزل " مافمة شي ..." صر سنونو بوجيعة ظاهرة " كيفاش طلعتو للجبل ...كيفاش ترمو رواحكم في الخطر "
سندت ظهرو بركبتها ومسحت على شعرو بحنية " ماڨدرتش نڨعد بعيدة وانت بها الحالة "
هز يوسف حاجبو ووشوش لحذامي "ياخا معشوقة ولد الڨايد هاذي "
ضربتو بمرفقها وزحفت ناحية ابرهيم " ابراهيم...شنوة احوالك ...تنجم تتحمل "
كان متوقع يرعش بكلو ...يترج من راسو لساقو لاسمو في فمها ...لكن ...ماحس بشي من النوع هاكي ...حاول ياقف على ركبتو "لاباس يابنت الكابيتان "
ركز بذراعو الصحيحة وخذى سلاحو من جديد ،وقفتو فاطمة مرعوبة " كيفاش تضرب البارود و انت في ها الحالة "
بعدها شوية ومارضاش تكمدلو جرحو " مازلت مامتش ..."
عمر ...ماكانش متلفت لحد...حتى بجية حذامي وفاطمة ...دوب ماخزرلهم وقعد بين المرة والمرة يضرب الرصاص ...
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
