قالو ناس زمان ⭐' الذهب الغالي ...والشرف اغلى منه ...والحديد رخيص والخاين ارخص منه '⭐
✴💜✴
شرفنا وعفتنا كانت تونسنا ...ضاع شرفنا وتعاركو عليه ذيوبتنا ...صوت البارود تكلم...ودم الرجال سواڨي...تونس يا عطشانة واش يكفيك دم باش تروي ...تونس يا حنانة شڨينا في عمر الشڨى ومالڨينا ...حفنة تراب منك ماتتڨاس حتى لو كانت ذهب والماس ...بلادي يا ذات القيمة ...قتلو فيك الصيد و زينو البهيمة ....تونس يا محنتنا توفى الحرب ونتلاڨو في جنتنا 🌹
⭐✴✴⭐
من فوق الجبل رڨوبة ...بعينين الذيب يشوف ويتبع فيلي صاير ...الارض ارضو ...والبلاد بلادو ...اما العارك والمعروك خاطينو ...الاول طاغي متجبر والثاني اطغى ...حسابات الحرب محسوبة ...ولعبة الاسياد ملعوبة ...تلمس مڨرونو ...ايلي على كتفه رابطو ...حك جبينو ...وخزر لصاحبو
"مانيش منجم نزيد نصبر ...الاولاد صغار وموش حمل حرب ولا دم ...انت اسبقني ليلي نجا...خليني نخلط علي مازال واحل غادي "
نڨز بخفة بين الحجر وتسرسب بلا مايخلي وراه جرة ...نادالو صاحبو " محمووووود ....نتلقاو في الاكاديمية "
تبسم وشاورلو بكفو ،ودار مكمل ثنيتو ...في قلبو بارشا خوف ...خايف تكون نهايتو بين ماكينات الحرب الكبيرة ...تموت معاه حلمة الاستقلال و صوت تونس المكتوم ...ماهناشو قلبو يقعد يستناهم لين يجوه للجبل ...قرر يدخل معاهم للنار واذا مكتبلو ربي الموت في بلاصة غير ها البلاصة ...فلا الرصاصة ولا الدبابة باش تأثر فيه .
⭐🌹⭐
"فيسع...فيسع...فيسع...فيسع "
كلمة لا اراديا قاعدة تتعاود في فمو وهو يعدي فيهم بالواحد بالواحد في الواد ..مطبس لوطة ...سلاحو مشبر في الناحية المقابلة وين كانت النار تڨدح بين الالمان والحلفاء...موش عارف علاش حس ايلي نجم يهربهم شوية ...اقل بياسر حتى من الخمسين ...شاور بكفو لعمر باش يكمل بيهم لفوق ع الحجر ويتسلسب بيهم حتى لراس الجبل ...وقت عطاهم بالظهر ونڨز طرف الواد راجع لقلب الرحى ،شدو عبد الرحمان من يدو " وين ماشي صياد!؟ "
"مازل شكون ماخلطش ...فمة شكون مانجمش يهرب وهو وسط الكرطوش "
دزو لتالي نيتو يمنعو و يخليه يمشي معاهم " ماترميش روحك للموت ...انت نبهت وفهمتهم ...وايلي يخاف على حياتو راهو خلط "
ماعمل حتى قيمة لكلماتو ...وكمل يجري راجع ...تبعو عبد الرحمان بعين متصورة موتو اكثر من حياتو وكيف شافو يبعد ويغيب مع الظلام خلط ع البقية ومنع بجلدو .
تسلسب بين الحجر وهز راسو يشوفش حد من جماعتو وقت مالقى حد تشجع باش يزيد يقدم اكثر لعل مازالو في وسط النار ...لبد لوطة وقت سمع صوت الفرنسيس متعدين قريب منو ...ضيق عينو وثبت فيهم ...كانو ستة وبين يديهم واحد بزي الالمان ...يكركرو فيه من ذرعاتو وركايبو يتجرو ع الحجر ...باين انو مجروح وماعندوش لا قوةو لا مقدرة يدافع على روحو...تنفس مالي رواريه وغمض عينو ...اذا منعو فمعناها واقف مع الالمان ...واذا خلاه ...فمعناها واقف مع الفرنسيس ...تلمس سلاحو كاينو يشاور فيه يصدم والا يتلهى كان بايلي جاء على خاطرو ...وفي لحظة التفكير هاكي ...كانت الرصاصات فوقو تصب مطر ...تبطح لوطة وحمل سلاحو معاه ...وكيف هز راسو مرة اخرى لقاهم فاتو ومعادش منجم يشوف كان خيالاتهم لكن مازال ينجم يسمع كلامهم ...الصوت الاول كان انڨليزي والصوت الثاني كان المااااني ...لكن ...كانت نبرة يوسف ...ماصدقش من الاول وقال هاذي من خيالاتي ...لكن هاكي اشارة باش يقرر شنوة يعمل ...شد ثنيتهم وتبع جرتهم ...صياد متلهف وفريستو قريبة ...لازمو في لحظة وبين اللحظتين ...يمنع الالماني و يثبت منو قبل ....اذا يوسف والا هو يهلوس.
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Adventure⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
