🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

👑الفصل 29 : خسارة الولد 👑

حرارة الكف كانت موش كافية بالنسبة ليه ...غلطتو ماتستحقش كف واحد اكاهاو ...شدلها يدها وضرب خدو بيها ...رغم ايلي كبست صوابعها وحطت فيهم قوتها باش  تمنعو ...لكن هو كان فور عليها وغلبها ...وقت  عجزت  قدامو صاحت ودموعها تتقاطر " محممممممد !"

من حشمتو مانجمش يهز فيها عينيه ،تحاشاها وبعد عليها ... عطاها بظهرو قبل ما تخمم هي تتزرف وتخرج " تنجم تقعد هوني قد ماتحب ...رتح مخك ...وماتخافش ...وجهي معادش تراه ..."

دخل يدو لجيب سروالو وجبد مفتاح الدار وحطو ع الطاولة ايلي بجنبو وبعدها هرول خارج تقول عليه هارب .

سندت ظهرها بالحيط ايلي وراها بحكم ساقيها معادش حاملينها ...اش ها النهار الاحرف! ...موش عارفة منين تشدها ...وموش منجمة لا تفرح ولا حتى تحزن على راحتها .

قلبو يضغط عليه وحاس عروقو باش تتطرشق ...كيفاش غلبو شيطانو ...كيفاش نسى اسمو واسم عايلتو ...اولاد الڨايد معروف عليهم الثقل والرزانة ...لكن هو وفي لحظة ضعف   رمى كل شي  وراه وخمم كان في حبو ايلي  خلاه تحت السافلين ...لازم يرميها من بير قلبو ...يتخلى عليها باي طريقة كانت ...لازم ينهي ها المهزلة ايلي خلاتو ضعيف وبلا شخصية قدام حبها .

            💚⭐💚

مد نصر  ذراعاتو لفوق وتكسل ...مط شفايفو وهو مازال يطعم في الماكلة ايلي مازالت مطعمها في فمو ، خزر لرايس ايلي اختار حجرة مسطحة باش يقعد عليها ويخزر بعيد للسماء" ولد الدشرة... ع الاقل اخترتهم كبار شوية ها الدجاجات ،جايبهملنا فلالس صغار يا دوبك الواحد عبى كرشو ...مازالت مصارني تتعصر بالجوع "

جاوبو راييس من غير لا  يخزرلو " اسمه حجل ،موش دجاج "

صفر و دوح براسو " تي كي بعضهم...دجاج والا حجل ،الزوز يبيضو ويطيرو ويقاقو "

مرة اخرى يجاوبو ببرودة دم وهو مازال مثبت في السماء" الدجاج مايطيرش ...والحجل مايڨاڨيش "

ضربو بالبرتكان على فخذو " ياخا قاصد تعكس اي كلمة انا نقولها ...!؟ "

قام راييس من بلاصتو ونفض بلاصة البرتكان وزيد هزو وحطو بعين مليانة حڨرة  " ايلي يشبحك  هكا مايعرفكش وقت تبكي ومتخبي بظهري لبارح "
ضحك عبد الرحمان ، عمر واسماعيل ع الفازة واستنو الرد من نصر ...ظاهر فيها الحرب بيناتهم باش تحلى .

" هي بابا مالا باش نعري صدري للالمان ...لا يا خويا ...العركة مابين اثنين والثالث منين ؟! ...وزيد انا مانحبش نموت ...وحيد امي وبابا ،لو تجرالي حاجة ،سلالتنا الكل تتقطع "

عوج راييس فمو "باي  هاااا  باااي ..."

تكلم عمر بجدية وهو يشاور  لمحمود ايلي واقف بعيد عليهم وعاطيهم بالظهر " لولاد ...علاش برايكم محمود خلانا كان احنا وبعث لخرين يروحو "