🌺حب تحت حكم الفلاڨة🌺
🌿💚💚🌿
★تونس 1954
تعنكش عبد القدوس في كرومة بوه ومارضاش يسيبو الا بعد ما شبعو بالبوس،جبدتو عليه اسينات وهبطتو من عندو " كبرت راك ماشاء الله راجل "
كبش في كفو وجبدو ليه " بابا عندي مانقلك وحدنا "
وساعت عين اسينات ع الكلمة " وحدكم ...علاه انا برانية "
زم شفايفو بجدية " سر يتقال كان للكابيتان "
ضحكات الكابيتان كثرو وها المرة سنونو تكشفت بالكامل حملو عندو وباسو من خدو " هيا يا مقاوم نحكو رجال صافي "
تبعتهم اسينات بعينيها وفمها محلول باهتة فيلي ربتو وعيت وفي الاخير يبيعها ويخير بوه ،دخلو لبيتها وزيد سكرو الباب مليح وقصدو يسمعوها صوت البلج باش ماتخممش تدخل غفلة ...لكن موش عليها هي جرات وراهم وحطت وذنها ع الباب... مايتغمضلهاش جفن اذا ماسمعتش ها السر .
تفقد عبد القدوس الشباك لعل حد يشوف فيهم وكيف ما لقى حد جرى لصندوق امو بعدو شوية وجبد من وراه هاك المخلى ايلي رزنت ومعادش ينجم يهزها الا بالتكركير ،هبط محمود على ركبة ونص وسألو بصوت واطي " هذا صوت رصاص !؟ "
حلو عبد القدوس المخلى وكشفلو ايلي فيها ،لمعو الرصاصات بلون نحاسهم ومعاهم لمعو عينيه " بابا ...لمدتهم من الجبل...باش نعطيهملك تحارب بيهم...انا وبشير صاحبي مسحناهم ونظفناهم مليح "
قعد مثبت فيه لحظات حس معاهم بقلبو يدق بقوة و عيونو تجمعت بدموعها ، حط كفو وراء قفاه وجبدو لصدرو ،باس راسو ببوسة مرصوصة " ولدي الرجال "
الكلمة خلات عيونو تلمع بفرحة رجع تعنكش فيه بقوة ورجعلو بوستو ،غرف محمود منهم حفنة وعباها في جيابو ...وعاود غرف مرة اخرى ...ثرص خدودو وشاورلو لباب ...حط صبعو على فمو باش يسكت وغمزو ...مشاو على طراطش صوابعهم وبالغفلة جبدو الباب ايلي قصدو ما يبلجوهوش ...تنفضت اسينات مفجوعة وحمار وجها ...خزر عبد القدوس لبوه ودقو على كفوف بعضهم وهوما يضحكو ، كتفت اسينات يديها وهزتهم وحطتهم متغششة ..
" تضحكو من غيري ...خسارتكم والله"
الصوت كان صوت حذامي من وراهم ،زربت ناحيتهم وطول عنقت محمود وباستو ، دزها عبد القدوس " بابا انا اكاهاو "
قرصتو لين شواتو " بابا انا قبلك "
ضحك الكابيتان وبذراعاتو الزوز لزهم لصدرو ايلي تحشرج بكحة فيسع ما سكتت ، كملت اسينات دخلت التعنيقة وها اامرة غفلت محمود وباستو من خدو ، خزرلها بتأنيب كيفاش تعمل حاجة كيف اكاكا قدام اولادو وهي غمزتو بمعنى ماشلق حد منهم ...صحيح...ماشلقوش ...لكن يوسف شاف كل شي...تبسم ع الفازة وهو يسكر حزام كرطوشو و يربط سلاحو على كتفو ...قرب منهم واول مافضو التعنيقة ،خذى كف حذامي وجبدها ...خزرتلو وخدودها زادو حمارو وقت حط يدها على كرشها " تلهالي بتاج الدين واضح "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Adventure⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
