🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🍀الفصل السادس : القلب دق 🍀

      ✴🎈🎈✴

كل واحد شادو من يدو وهوما هازينو لوين ماجن قديم متناصف بالماء بطبيعة موش نظيف مليح ...تململ ..تمعطط ..تجبد لعل يسيب روحو منهم ...شي النافع الله ...حاولهم ...طمعهم بالفلوس باقي ماوصل لشي معاهم ...صاح بصوت عالي(بالفرنسية )"حبسو حبسو حبسووووو "

وقفوا ااجنود الزوز وخزرولو بقلة صبر ...رمشت شوافرو وهو يسأل (فرنسية )"غارق الماجن !؟"
حرك واحد منهم راسو باش يأكدلو ومن بعد كملو كركروه ...عاود صاح باش يحبسو "استنو استنو استنو "
نفخ واحد منهم (بالفرنسية ) "آخر مرة نسمحولك تتكلم "
اقترح عليهم "سيبوني تو نمشي وحدي ...مانيش خواف كيما تتصورو "
خزرو لبعضهم ومن بعد سيبولو ذراعاتو ...من غير ما يستنى خطف الدورة  وجاء مڨطع ...أما هوما كانو قارين حساباتهم فيسع ما خلطو عليه وشدوه ...كركروه بالسيف عليه وزيد حلو باب الماجن الصغير ودزوه بقوة لين تسمع تبقبيقو لداخل ،تلفو صوتو  ايلي جاي من القاع "خرجووووني ...الماء يعيف هوني "
سكرو الباب مليح بعدو ونفذو يديهم منو ...رجعو لبلاصتهم وكايني ماصار شي .
في الساحة الكبيرة ،تلموا الضباط المتدربين في صفوف متوازية ...كل عشرين مع بعضهم ...فمة كعبات  قعدو يطلفحو موش لاقين ڨروب يدخلو فيه ...وبما فيهم ...راييس ...حذامي ...وطفل اخر ...كان ضعيف و متوسط في الطول ...ابيض  و مزيان بارشا ...اما باين عليه انو مازال صغير يادوبك يخلط للعشرين ايلي خلاه يرعش بطريقة موش منجم يتحكم فيها بروحو  ....صاح محمود بصوتو ايلي يفجع "هيا كملتوووش ...نحب نرى عشرة صفوف كل صف فيه عشرين واحد ...تحركوا "
ماعندهاش حل اخر غير تلقى اي ڨروب تتحشى معاهم ...جبدت راييس ومدت يدها للطفل ايلي ظاهر فيه ضايع فيها طول وعرض و هرولت لاقرب ڨروب ناقص ...مشى لمين بين صفوف وكل مايلقى واحد يتبهلل في الوسط يدزو كيف ماجاء لأي ڨروب ...وكيف خلط قريبلها خزرلها على جنب وتعدى ...ماعندوش حتى كلمة يقولهالها ...ديجا لقات ڨروب وجوها مريڨل ...تنفست براحة وقت راتو يرجع لبلاصتو بحذا محمود ...اما وقت هزت راسها وخزرت ليلي معاها حلت فمها ماردتو ...طاح قلبها من بلاصتها وهي تشوف في نصر يلعب بحواجبو ومعاه اسماعيل ياكل في بعضو وبالسيف شاد روحو عليها ...يظهرلي فيه مازال يغلي ع الضربة ايلي عطتهالو ...ملا وحلة تو ...مشات للموت بساقيها ...موش باش يخلوها على راحتها وباش يقعد وراها لين يكشفو سرها ...نفخت بقلة صبر وهي تهرب من خزراتهم...وقت شافت ابراهيم واقف ومعاه عمر ...حست براحة نوع ما ...موش عارفة علاش احساسها يقلها طالما هو موجود فنصر موش باش يعمللها شي ...فاقت على سرحتها وتخضريتاتها وقت حست بيد تشد ذراعها وتكبس عليها ...خزرت ليلي مكبش فيها لقاتو هاك الطفل ايلي لولاها هي كان لتوا يتبهلل وسط الصفوف ...ثبتت فيه مليح لقاتو يرعش بكلو ...موش كان هي خايفة فم ...هاو فمة شكون ميت بالخوف الاصل ...عدت صوابعها على يدو باش تطمنو وتثبتو ...هز عينيه فيها وخزرلها بدمعة متجمدة ...تبسمتلو ورمشت بعينها بمعنى مافمة شي يخوف ...بلع ريقو بصعوبة وحاول يظهر روحو قوي ...وقت شاف وجها الصافي  تخيل ايلي فمة حد اخر في عمرو ...وانو موش هو الوحيد ايلي مازال ماغلقش الثمنتاش .
جاهم صوت محمود خلاهم يركزو معاه وينسو كل شي " فمة ڨروب باش يقعد ناقص واحد ...تو يكمللكم غدوة بعد ما يكمل عقوبتو ....وتوا نحبكم واحد وراء واحد تعملو اربعين  دورة بها الساحة ...مانحبش التكركير والحديث وخاصة الدلال متاعكم ...هوني عسكر موش كوجينات فيلاتكم ...يلاااا...اكبسو رواحكم "
عض نصر شفايفو وهو يتمتم "يا والله حال ...تالمون يدور فينا على ها الساحة مانخرجو منها كان زرابيط "
تبسم ابراهيم وتعدى من جنبو " بها الدلال هذا ...ياذنوبي تخرج منها الاكاديمية "
ضربو عمر على صدرو وهو يضحك بالشوية  باش ما يسمعهوش لمين وايلي معاه...حاول يقلد محمود "ايا اكبس روحك ...يلاااا"
زمت شفايفها بقلة صبر ...ياخا كل يوم تدور على ها الساحة المحنونة ...مابيد الحيلة مضطرة تنفذ ...بدات تجري ووراها راييس ويتبع فيهم اك الطفل المتله.