🌺حب تحت حكم الفلاڨة🌺
💚🌿🌿💚خزر لصوابعها المتشابكة مع صوابع نصر وبعد خزرت لوجهو والتبسيمة مالية وجهها " نحبك نصر "
ضيق عينو " هات من الاخير ...نعرفك راو "
ضحكت " مانيش باش نطلب شي ...ها المرة قلتهالك لانو هكا حسيت "
وقف قدامها وتلمس خدودها " بعثت جواب لخوك...وهاني نستنى في الرد ...واول ما يوافق...مانوخرش ثانية ...ونعرسو "
غمضت عينيها وحركت يديها بفرحة " ان شاء الله ...ان شااااء الله "
قعد يثبت فيها للحظات من بعد عنقها ...حمارو خدودها وماعرفتش تملص منو روحها والا تروي عطشها منو...اذا راها يوسف هكاكا الا ما يقدد لحمها وينشرو...جبدت روحها منو وهبطت راسها حاشمة " لازم نروح "
باس جبينها وسرق بوسة من عينيها " ممكن نغيب ايامات "
احتجت " نعرفها الايامات ...شهر والا شهرين "
ضحك وقرص خدودها " دلالك هذا لازم انحيهولك...قول الحق فيا انا نتبع في بنية صغيرة "
ضربتو على صدرو "نذكرك عمري عشرين واندادي بصغارهم "
شاف من بعيد راييس دوب ما يظهر وبعد تخبى ..عرف انو فمة حاجة صارت ...لذا دورها ناحية النهج ايلي يهز لدارهم " تحرك ...تحرك روح ..."
شدت في ذراعو "ماتغيييبش بااارشا "
باس يدها "مانصبرش عليك...ماتخافش..." شاورلها بيدها " هيا امشي "
غمزتو و هبطت تجري قاصدة دارهم فرحانة وفرحتها موش سايعتها وهي تلعب بالوردات الجدد ايلي شراهملها نصر تعويضا للقدم .
اشاراة راييس كانت واضحة ...هو يسبقو ...وهو يخلط عليه ...تتليف للجرة وباش ما يجلبوش انتباه حد...مشى على طول ااطريق بخطوات عادية وبعد كسر ع اليسار وقتها زرب لين وصل لهاك المخبى ...دخل لقى راييس ومحمد الڨايد واقفين ووجوهم ماتبشرش بخير ...
"شصار " سأل بقلة صبر
قدم منو محمد " لازمنا نشوفو عايلات الفرسان ايلي هوني ونبدلولهم بلايصهم "
هز نصر اكتافو " هوما اصلا كل مرة يبدلو بلايصهم ...شنوة صاير علاش ها المرة الزربة؟! "
تفخ راييس " ستيفو ...لمد قوادة و زرعهم هنا ...باش يجيبوله اخبارهم"
وساعت عين نصر " تحب تقول ...انو الكلب ستيفو ...ناوي يعاقب عايلات الفرسان...لا لا...لحظة..." مشط شعر لحيتو " قصدك ...يعملهم طعم باش يحصل الرجال ؟!... لكن عايلاتهم...اما نساء والا صغار والا رجال مايقدروش ..."
ضرب راييس الارض بساقو " هذاكا علاه ...لازمنا فيسع نوصلولهم و انڨلوهم لبلاصة أكثر امان "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Phiêu lưu⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...