✴✴
يمشو جنب لجنب رغم ايلي تمنى يكونو اليد في اليد...ياريتو كان ينجم يقول للعالم الكل ويحكيلهم عليها ...خزرتلو بعين تلمع وتبسيمة خفيفة دوب ما ترسمت على فمها خلت ضلوعو تصدع في بعضها ...وكملت تصدعت اكثر واكثر وترجت وقت هزو روسهم وخزرو ليلي واقف قدامهم ...يديه وراء ظهرو معقودين وراسو لفوق بغرور كيف عادتو ...تربثت وماعرفتش شتعمل ويوسف بلع ريقو بخوف ...على اساس ياخو رخصة باش يخرج من الاكاديمية ...اما مانجمش يستنى اكثر بعد ما عطاتو بية العنوان ...يمكن لهاك السبب محمود يڨحرلو و خاصتو باش يقتلو...قدم ناحيتهم وهو يمشي في عقل عقلو قاصد يزيد يرعبو ...
خزر لحذامي من تحت لتحت "انت ...اسبقني للبيرو "
حبت تفسرلو "سي محمود انا ..."
قص عليها وهو يصيح "كااابيتان محمووود ..."
كبست على قماش الزي متاعها و كمشتو بين صوابعها وصححت ايلي قالتو "كا...بيتان ...محمود "
شاورلها براسها " فااازي للبيرو"
ڨحر ليوسف وضيق عينو ايلي شعلت شعلان ...من الظاهر انو مغشش وع الاخير ...استنى يوسف لين بعدت عليهم باش يبدى يفسرلو " كانت مستحقة نعاونها وانا ..."
صر سنونو و ماخلهوش يكمل " انت تحت امرتي انا ...تمشي بمشورتي انا ...يدك لراسك تهزها كان بعلمي انا ...وبما انك عسكري في حالة حرب ...فقلبك ومشاعرك تعفس عليهم وتتعدى..."
موش عارف كيفاه نجم يواجهو وقص على كلامو " ماانجمش ... ماانجمش نعفس على قلبي خاطر هي فيه ...ماانجمش نتعدى وقت ايلي هي في حاجة ليا ...انا عسكري بقلب حي ...في حالة حرب ايه...والحرب ماانجمش ندخلها الا ماتكون هي بجانبي ..."لعق شفايفو وهبط عينو "انا خرجت من الاكاديمية بعد ماكملت التدريب واحترمت واجبي ...كان لازم ناخو اذنك ...لكن ...ماكانش لازم نضيع الوقت وهي في مشكلة ..." كبس بدنو وتسنتر بانضباط ظاهر " انا حاضر لاي عقوبة "
يوسف قال كلمات صغار وبساط...لكن صابوه في قلبو ...حط يدو على داه ...بعد ها السنين ...نجم يفهم انو...كان عسكري بقلب ميت ...انو عفس على قلبو وعفس معاه على محبتو ومحبة عايلتو وخاصة بنتو ...نجم يفهم انو سبب خسارتو طول ها السنين كان خاطرو وحدو...لو دخل لها الحرب ومعاه بنتو ...ماكانش توجع بهاك الطريقة .
صوتو خرج مخنوق ويرعش وهو يشاورلو لساحة التدريب "امشي ..."
تردد شوية وقعد يخزر لمحمود موش مستوعب انو صراحتو نجمت تطفي النار ايلي كانت في عينيه...شافو يتعدى من جنبو ويقصد الدروج ايلي تهز لبيروه ....حس بخوف عليها...اذا هو نجم يواجه محمود فهي مستحيل رغم ايلي قالتلو انها ماتخافش منو .
وقفت وسط البيرو و هي ترعش بكلها ...موش عارفة اذا ايلي حاسة بيه وقتها خوف والا شعور اخر....خذات هواء مالي رواريها و نفختو بقوة ...فكرة انها وجه لوجه مع محمود ووحدها خلى قلبها يخض ...يخض...يخض ...لدرجة تخيلت معاه انو صوتو وصل ليلي في الاكاديمية الكل ...دورت عينيها في تراكن البيرو تشوف في لمستو عليه ..جلب انتباها تصويرة دوب ما ظاهرة في جيب الكبوط المعلق حذاها. ..لا اراديا مدت يدها وجبدتها رغم ايلي تعرف انو موش من حقها وموش من حدها ...تحل فمها على كبرو ووساعت عينيها بصدمة وهي تشوف في تصويرة مرا ضحكتها مالية وجها وسفساريها مغطي شعرها ...
✴ 💜💜✴
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
