✴🌺 نهاية حب تحت حكم الفلاڨة🌺 ✴
🌿💚💚🌿
قعدت يخزر لهاك الراجل وهو يحفر في الارض وعرقو مندي وجهو ،زحف قربلو وسألو
" بابا عزيزي ...شنوة ايلي تزرع فيه "
جاوبو وهو يحطلو مظلتو على راسو " زيتونة ..."
" شنوة تعطينا ..."
تنهد وهز يستوي ظهرو ويركز على فاسو " تعطينا بارشا حاجات ...تعطينا الزيت ...تعطينا الزيتون ...تعطينا الظل ...تعطينا الخير...تعطينا البركة...تعطينا جذور...تعطينا اصل ..."
بعد المظلة الكبيرة ايلي طاحت على عينيه وهز راسو يخزرلو "بابا عزيزي ...باش تبقى تزرع في الزيتونة ديما "
تبسم "ايه...بارشا زيتونات "
حفر هاك الصغير بيدو ونبش الارض ،مال عليه الكبير وسألو " تاج الدين فاش تعمل "
من غير مايخزرلو " نحب ..نزرع زيتونة حتى انا ..."
وقفو وهو ينفض التراب عليه " يكفي انك تسقيها وتتلهى بيها ...وماتخليش عروقها تجف ...انا نزرع ...وانت اسقي ...تفاهمنا "
عنقو من ساقو " باهي ...بابا عزيزي...انا نحبك اكثر من حذامي ...ويوسف ...و ازهار واسينات و عبد القدوس و بشير "
حط يوسف يديه على وسطو ونحى مظلتو " نعم !...يوسف حاف...موش بابا "
ضحك تاج الدين وتخبى وراء جدو ايلي ڨحر ليوسف ، عمل روحو ولد الشادلي يخزر للدوار " وقت فطور ...علاه ماجابولناش هاك النساء لقمة ناكلوها واك عمر ظهرلو تو يهز بية لدارهم... ورئيس الدوار ماطلش من نهارين لاهي بالتوامة متاعو ...خلوني وحدي مع ..."
خزر لمحمود ايلي همزو بالفاس " كملت الحفر ايلي قتلك عليهم "
نفض الغبرة على حوايجو " ايه...هوكا هي وهي ولازم تعمل من عذابي صنعة ...قبل الفلاڨة وتوا الفلاحة "
نطرلو المظلة متاعو " عاطيك بنتي ايلي مابعدها طفلة ...وياربيش تخلص دينك "
عوج فمو موش عاجبو وبعد سألو بجدية " جاش جواب من عبد القدوس ملي ولى تابع الجيش التونسي ما بعث كان زوز جوابات ...موش ناوي يروح "
جاوبو محمود وهو يمسح عرقو "ساعات يروح للصادق ( بو حذامي ايلي رباها ) كيف تبدى عندو نهارات راحة ...حتى لين يوفى تدريبو...وهوكا معاه طه ياسين ما يتخاقش عليه ...عرفتو طه ياسين ...هاك الولد ايلي كان معانا ليلة الاستقلال ...ايلي تخبى بين الفرنسيس"
من بعيد لاحت حذامي هي واسينات وازهار وقفة الفطور في يديهم ، فرك يوسف كفوفو " ياربي كسكسي ...يااااااربي "
قربت منو حذامي وهو مد يدو للقفة خذاها منها ومانساش يتلمس صوابعها ويغمزها ...حمارو خدودها وتلفت الحكاية وهي تحمل تاج الدين " فلاح انت والا فلاڨ "
ضحك وهو يخزر لمحمود يحب يقلها ويوصللها انو ماشي على خطوتو " مقاوم "
تحسست ازهار العلم المطوي بين حوايحها وايلي ما يفارقها ...مقاوم...وايلي عشقو قلبها مقاوم شهيد...قررت تكتب ذاكرتو وحكايتو ...للاجيال ايلي جاية...تحكي كل شي شهدتو في الحرب ايلي تعدت ...لعل ...الاجيال الجاية تعرف قيمة ها الارث ايلي قعدلهم .
وسط ضحكاتهم وهوما ملمومين تحت الزيتونة المظللة ياكلو من خير الارض ويتسامرو بذكرياتهم ...كان عهد جديد يتبنى لتونس على اكتاف ايلي حبوها و كانو اوفياء ليها ...مقاومين بعد السلاح كل حد فيهم كمل خياتو ايلي وقف عليها ...اسماعيل شد مخابز بوه و ماغفلش على ام وبو نصر ...ديما معاهم ...طاهر قرر يكون طبيب اعشاب وينفع الناس بمعرفتو ...رئيس عرس بحبيبة قلبو وجاب في عوض الصغير زوز وتولهى في ارض بوه ...ابراهيم كمل خدمتو ايلي قراها وحل مكتب محاماة وقرر يربي صغيرو التربية ايلي ترباها وفاطمة ماسلمتش في ارضها ساعة ساعة تجيها وتتفقدها ...محمد خوه كمل في تجارة بوه وعاش بقية حياتو مع زينة البنات ايلي ماعرف كان هي ...وغيرهم وغيرهم ...تعبو باش جابو الحرية ...وعاشو بعدها بحياة جديدة ...تليق بيهم .
اخرة حديثنا ...وحكايتنا ...نقولو ...كلمة وحدة...قالوها قبل ومازالو باش يقولوها بعدنا " "" 💚تحيا تونس 💚""
✴✴✴🌼تمت بحمد الله 🌼✴✴✴
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Adventure⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
