🌺حب تحت حكم الفلاڨة 🌺
🌿✴✴🌿
عينين ...بلون العسل ...موروثين من عند بوها ...تبعت الفرامل وهوما ماشين جايين وبلايزهم البيضاء خبلوهما...روبتها ...وايلي على شوية كانت نسات كيفاش تتلبس ، مغطية ساقيها حد الكعبة ...وسطها محزوق بحزام حرير بين ضعفو ورقتو ...شعرها طال في شهور قليلة وماكانتش تحلم انو باش يفوت رقبتها ...ضفرت منو شوية ولمتو ع الاجناب ...ضوى وجها مليح وبينت ملامح الانوثة ايلي فيها ، بعد الاكاديمية تنحات القشرة القاسية ...وفيانت بشرتها ...ومعادش حد ينجم يغلط فيها على انها راجل ...
تتحرك بعصب وبقلة صبر ...استنت بمافيه ااكفاية ولازم ماتزيدش تصبر حياة أسينات في رقبتها وكل توخيرة تعملها تاخو من عمر المرا ايلي خلت بوها عايش وواقف طول سنين فراقها ...قدمت خطيوات ناحية ممرضة من الممرضات و سألتها بلغة فرنساوية مضبوطة " الدكتور وقتاش باش يخرج..."
خزرتلها الفرملية من فوق لفوق قبل ما تجاوبها بلغتها الفرنساوية " ما نعرفش...اما وقت توفى عمليتو تو يخرج "ثبتت فيها بشك" فمة طبة اخرين...ينجمو يقلبو عليك و يشوفو مرضك من غير ما تقعد تستنى الجراح "
ماحبتش تزيد تطول الهدرة معاها " لا..انا طبيبي الدكتور توفيق...وميسالش تو نستناه"
بطا بعدها ...وطوالت عمليتو ايلي المفروض توفى فيسع ...شكت انها مستحيل تخلط على اسينات حية بها التوخير وتضييع الوقت ...زادت حدة خطواتها ومعادش تزيد تصبر...ساعة ساعة يشجعها عقلها يقلها ادهم عليه وهد لداخل وبعد...تقول لا ...هكا باش تكشف كل شي وحياتها وحياة العزاز عليها باش يكونو في خطر .
وقت كمل الطبيب وخرج من بيت العملية ...كانت ديجا ساعة جديدة ضاعت منها ... ماعرفتهوش وقت تعدى من جنبها الا ماعيطتلو الفرملية وهي تشاور لحذامي "دكتور توفيق ...عندك مريضتك تستنى فيك "
تلفتلها مزروب ...لقاها صبية يادوبك دخلت للعشرينات ...متوسطة الطول وجويدة في عظمها ...لكن عينيها كانو يلمعو بطريقة جلبت انتباهو ، ثبت فيها مليح وهو يحاول يتفكر من وقتاش وهي مريضتو " انت ...داويت عندي قبل؟!"
اضطرت تكذب " ايه و...شقيتلي كرشي...و...الجرح قلقني جيتك باش ...تتفقد ...اذا عروقي...يجري فيها الدم صافي ...والا ...في دمي مازالت فمة جرثومة "
الكلمات موزونين...مرتبين ...و عندهم معنى واحد...كلمات السر ايلي تجمع عروڨ تونس ..قعد يثبت فيها لثواني باهت ويحاول يستوعب انو بعد مدة طويلة عاودو رجعو للساحة ...شاورلها لقاعة الفحص وهو يسبقها ليها " تفضل نعاينك ...واذا ع الجرثومة تداوى ويرجع دمك نظيف "
تهلل وجها وقت سمعت منو الاجابة ايلي لازم تسمعها...وبيهم تأكدت انو الشخص المقصود وموش غالطة فيه...اول ماسكر الباب ...شاورلها تقعد على اقرب كرسي وقعد هو مقابلها تلهف في سؤالو "من عروڨ تونس ؟! "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Phiêu lưu⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
