دور المفتاح في كوبة الباب ودز حلو ...في بالو باش يلقى البيت فاضية ومافيها حد ...تفاجئ بمرتو تاقف قدامو وتتبسم لرجوعو ،خزرلها موش مصدق
"اسينات !؟ شبيك لتوا لا مشيت للكازينو؟! "
خذات منو البيرية ايلي بين صوابعو وتبسمت " نخمم نقلل من مشياني للكازينو والا نقطعو جملة ..."
"امممم...والسبب "
حطت يدها على كتفو "توا مرا معرسة وعندي راجل لازم نتلهى بيه وبداري "
غمزها وشاور براسو لا "هات الصحيح "
ضحكت "ظاهر عليا نكذب "
حل بوتونات الزي الاولانين وماهزش عينو من عليها " حاشاك ...اما ...عندك كلام تحت لسانك ...قول هاني نسمع فيك "
خذات يدو وفركت كفو بصوابعها "تعرف ايلي انا نحبك موش هكا ،حتى ولو انت ماتحبنيش"
نفخ بعصب "اوووف اسينات ...انت مرتي وشريكتي وباقي تقلي مانحبكش ..."
عدت ذراعاتها على وسطو "خليني نسمعها "
قرص خدودها وتبسم بحب "موش كبرنا على ها الدلال اسينات "
"الحب مافيهوش كبير وصغير ...العمر موش مكيال نقيسو بيه المحبة ...انا مثلا حبيتك وانا صغيرة ...وزدت حبيتك اكثر وانا كبيرة "
تبسم و تلمس خدودها بحنية وهي رجعت خذات كفو بين صوابعها ،ضغطت عليه بقوة حطتو على كرشها ...تلاشت تبسيمتو ولخلخ بكلو ...شحب وجهو ورعش من ساقو لراسو ...جبد يدو منها ووخر لتالي خطوتين ..تمتم باسمها بضياع" اسينات!!!"
دمعت عيونها وقدمت منو وهي تشدو من ذراعاتو "محموووود "
بعدها عليه"اسيناااات...يعيشك ..." حاول ينظم انفاسو ويسيطر على روحو "ايلي ...نخمم فيه انا ..موش صحيح ...؟! "
بلعت ريقها " ...صحيح ...محمود...هاذي فرصة جديدة ليك باش تعيش ابوتك من اولها ..."
حط يدو على راسو تقول مصيبة هبطت عليه " اخ ...أسينات ...اخخخخ...علاش يصير فيا هكا ...علاش الدنيا مصرة تكبلي يديا ...اسينات ...قلي .. انا علاش بعدت بنتي عليا ؟! ...انا علاش رضيت نتحرق بنار فراقها ؟!...انا علاش ماكونتش عايلة طول ها السنين الكل ...جاوبني علاااااش؟!!!"
هبطت راسها وهبطت معاها دموعها "في بالي باش تفرح ..."
" نفرح...لو ماكنتش انا محمود... نفرح لو جينا في غير ها الوقت ...هالي في كرشك يا نضطر نبعدو عليا كيف ماعملت مع حذامي ...يا يقتلوه وقدام عيني نكاية فيا..اسينات انت هكا ربطتلي يديا وساقيا ...عطيتهم حاجة يهددوني بيها ويكممولي بيها فمي.. "
✴🌹🌹
نبرتو نطقت بكل وجيعتو وكشفت خوفو وعرت جروحو ايلي مازالت تنزف من النهار ايلي خلى قطعة من روحو ...ولو ماتحسش بيه هي ...حد ماباش يحس بيه ولا باش يفهمو ...كان بركان على حالو مايتقربش وهو منرفز ع الاخير ...لكن هي ماتخافش منو ...وماتهربش منو ...ع العكس ...زادت قربت منو ...خزرت في عينيه ...وبدمعة جفونها خلاتو يسكت للحظات واستغلتها هي فرصة باش تحكي
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Приключения⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
