🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🍀الفصل التاسع: محمود 🌸أسينات 🍀

✴✴✴✴✴
حذامي بعد ماسمعت "نحو الزي " 😂صدمة ...كبيييرة (الغناية) 😂
✴✴✴✴✴
المرة هاذي عينها وساعت لين قريب تخرج من بلاصتها ...قلبها ذااااب ماتعرفش عليه وين طاح بالضبط...شنوة معناها نحو الزي ؟!...وزيد مايقعدو في شي ...هاااا شومي هااااه...يعني باش تعري روحها ...وتكشف روحها ...وتبان مرا ...وزيد للناس الكل ...علاه ها النهار الازرق الاحرف المشوم ...حالف يكشفها ...
خزرت لجنابها لقات الناس الكل بدات تنحي وفيهم حتى ايلي كمل وقعد صدرو عريان ...يعني 199 راجل باش يطلعو قدامها اكاكا ...تبعتو بعينين مصدومة ووجه احمر ...ماتشلق كان بخف على رقبتها خلاها توزوز ...تلفتتلو لقاتو اسماعيل  يضحك ...كبس ذراعو وراها عضلاتو "وانت يافرخ ...حاشم تورينا شعندك "
كان تعرف شعندي ايلي ما تقعد ليلالي تدادي في ها الساحة ...حاجة جبدتها وبقوة ...خلاتها تخزر ليمينها وتطفي اسماعيل ...وها الحاجة هي ابراهيم الڨايد ...بدنو كان منحوت نحتان ...كل عضلة مصففة فوق اختها بطريقة منظمة تقول عارفة بلاصتها ...شحمة زايدة لا ...اكتافو عريضة عملت فورمة مزيانة لصدرو وكرشو مسطحة تقول ماعندوش كرش كي خلق ربي ، حلت فمها ماردتو وقعدت تخزرلو ...اول مرة في حياتها تشوف ها المنظر  ...تبسملها وقت شلق بيها اتبع فيه وهز حاجبو بمعنى انت زادا ابدى...بلعت ريقها وهي ادنكس راسها ...لتو موش لاقية حل ...ياربي اش باش نعمل توا ...
صاح لمين وهو ماشي ويقرب من الصف ايلي هي فيه " البرتكانات تتنحى زادا...تقعدو حفايا "
تخبت وراء اسماعيل  نيتها لمين مايراهاش ...اما من زهرها كان وراها طول محمود ...شدها باطرف صوابعو وكركرها خطوات لين بعدها ع الصف وضربها بساقو في ركبتها ...طاحت لوطة وهي تتوجع ....مال فوقها وجبدها من كول الزي " فاش تستنى باش تعمل ايلي قتلك عليه "
لازمها تتصرف ....زعمة تبكي وتبوسلو ساقو وتقلو سامحني. ...والا تهرب طول ....
تلعثمت " انا ..."
جات لبالها فكرة ...اذا عملت روحها دايخة ...باش يخلوها ترتاح  وماتتعاقبش معاهم ...رمات الاربعة وغمضت عينها وهي مسبولة قدام محمود ...لازمو يصدق انها دايخة ...الكل قعدو يخزرولها ،مستغربين ...شنوة صارلها وعلاش ممدودة بالطريقة ...أما  محمود كان فاهم اللعبة ...لكزها بساقو وهو زام شفايفو "تحرك قوم "
خممت بينها وين روحها مالازمش تخاف وتكبش في الفازة لازم تجد عليه انها دايخة وتحاول ما ترمش حتى ...سمعتو ينفخ بقلة صبر ومن بعد هبط عليها كيف العڨاب خطفها من اكتافها وكيف الريشة نفضها  جابها واقفة...ماتت بالرعب وماشلقت بروحها كان تشهق وتحل عينها على كبرهم ..استغرب انو راجل يكون بالليونة هاكي وبشرتو صافية ونظيفة ومافمة حتى اثار موس متاع حجامة على لحيتو وغير هذا اكتافها ضعاف ع الاخير ...اما بالاخير ايلي جابوهم لفم صغار في العمر وفيهم ايلي ما غلقش الثمنطاش كيما شاف مرة دوسي من دوسيات المتدربين  ويمكن هذا هو الطفل الصغير ايلي شاف دوسيه ...
لمعة في عينيه ...تقول نار تاكل فيه ...مغشش وظاهر من ملامحو انو موش باش يعديلها الفازة ،طيشها على طول يدو جابها على ركايبها وساور  لززوز  جنود فرنسيس " حطوه في الحبس نهارين كاملين و....وحدو"
موش عارفة تفرح والا تخاف ...تفرح لانو موش باش تضطر تنحي حوايجها وتكشف حقيقتها ...وفرد وقت هي خايفة...يعني تتحبس ووحدها ...وفي بلاصة موش عارفة وين والا شنوة باش يصير معاها .
كركروها وهي ساكتة ...اذا صاحت واحتجت ممكن محمود يبدل رايو ويفرض عليها حاجة اخرى تكون كارثة ..هبطوها لوطة وين فمة كاف مقسم لبيوت بيوت ..فيها الواسعة وفيها الضيقة...اغلبيتها كانت فارغة ...شافت زوز والا تلاثة فيهم عباد ...مانجمتش تثبت فيهم ...لانو قلبها شوي اخر وياقف من الخوف ...حلولها الباب ورموها لداخل وسكرو وراها بكادنا حديد .