🌺حب تحت حكم الفلاڨة🌺
🌿💚🌿
تلاثة كلمات نطقهم ...هبطو كيف النار ع الهشيم على القايد...بحلق في يوسف بشك وقعد يخزرلو يستنى فيه يكمل يحكي ويوضحلو ...اما بالنسبة لولد الشادلي فذرة خوف ماعندوش في قلبو...والكم الكبير متاع السلاحات المتلهفة باش تقصفلو عمرو ما حركتش حتى شعرة منو ...رجع سكينتو لبلاصتها وشاور براسو لضحيتو الغارقة في دمها "لوجو بين حوايجو ...لعل تلقاو الاثبات "
سكوت طويل وانفاس مقبوضة بعد كلمتو ...عطى القايد اشارتو لواحد من الرجال باش يثبت من الميت ...هبط عليه لاخر وماخلى شي مافركسوش ...وكيف مالقى شي وخر لتالي وهمز صدر يوسف بفم مڨرونو " خاين وكذاب ...وسفيه من فوق "
هز يوسف كفو " ا..ا ...ا....رد بالك تقول ها الكلمة مرة ثالثة ...اذا سمعتها مرة اخرى ...نخلطك عليه "
ثار الراجل وعض شفايفو بغل " وفيك فم وتتكلم وتهدد وروحك بين يديا "
تبسم يوسف بتحدي " الروح بين يدين خالقها ...اذا ماجاش اجلها ...لا انت ولا رصاصك تنجم تاخذها "
سألو قايد الرجال وهو ياقف قدامو" قتلت يدي ليمين بتعلة انو خاين ...وطلع موش خاين...هكا موتك يولي حق "
نفخ يوسف وطبس على هاك الميت..قلبو على كرشو ودخل يدو لتخت حزامو وجبد فلوس ومعاهم ورقة صغيرة مطوية ...قدام بهتتهم وصدمتهم مانجمش مايقدمش عرضو ،مشى وتبختر في وسطهم ويدو لفوق باش ايلي ما شافش يشوف " فلوس فرنسيس...وعنوان فرنسيس ...برايكم اش يعمل عند واحد من رجالكم ..؟!...هذا دليل كافي والا نزيد دليل جديد؟! "
سألو القايد وهو مصدوم وفمو محلول على كبرو " وكيفاش عرفت انو خاين...اذا نحن نباتو ونصبحو معاه ما فقناش بيه "
خزرلو على جنب قبل مايدورلو بكلو " محمود...رامي عروقو في كل بلاصة...والاخبار تجيه اول باول ...وايلي خانك...كان كل نهار خميس يقابل ضابط فرنسيسي يصبلو الجديد ويفكرو بالقديم...وانتوما غافلين "
التوشويش وسط الرجال كثر وكل واحد بدا يعطي في رايو ويحلل ويناقش في هاك الغريبة ... اضطر معاهم القايد يهز كفو يسكتهم " تحب تقول هذا عربون ثقة مع الكابيتان ؟! "
قعد يوسف ع ااحجر بكل برودة اعصاب ومن غير خوف" تنجم تقول "
ركز قايدهم على سلاحو وسأل " والمقابل؟! "
خذى يوسف نفس طويل وبدا يفسرلو " الكابيتان ...طالب كل مجموعة صغيرة من المجاهدين تنضم لمحموعة اكبر ..وفي عوض نقعدو مفرقين وكل واحد يغني على زي راسو ...يعرض عليكم نتلمو الكل يد وحدة ...بالمختصر ...يحبنا نكونو جيش واحد ضد المستعمر ..."
ضحك القايد " ومحمود يحبنا تحت جناحو ؟! يحب يكون قايد علينا و المشورة مشورتو هو و الراي رايو هو واحنا نتبعو في جرتو "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
