#أكاديمية_الباي_العسكرية
متكي ع الكرسي وحاط ساقيه ع الطاولة ايلي قدامو ،مغمض عينو وسارح يدندن في الغناية ايلي سمعها لبارح في الكازينو "ع الجرجااااار " ...هو اكاكا وتجيه ضربة على مرفقو خلاتو يتنفض من بلاصتو ويخزر وراه ...عوج فمو على جنب ورجع لقعدتو بعد مالقاه بوه "سي...الشادلي هاك هوني "
قعد بوه مقابلو وهو يمشط في شلاغمو "بالطبيعة هوني ...بعد فضيحة كازينو لابلوند ايلي عملتها امس ...طبيعي نجي " ضيق عينو ومال ناحيتو "ياخا بلا عقل انت ...هاذي عملة !؟...تعرف الطفلة هاكي خطيبة شكون ...انت ناوي تعملي مشكلة بالسيف يظهر فيك "
غمض عينو بقلة صبر "خايف على مصالحك ...نعرفك خطيبة شكون ...ومايهمنيش ...هي مغنية ..رقاصة في الكازينو وعجبتني ...فيهاش حاجة "
بان الغش على بوه "والله لا تحشم...ولاتجعر...ولا تولي عبد..." زم شفايفو "هاو انبه عليك...معادش تدور بيها ولا تكلمها والا باش نتصرف معاك بطريقة موش باش تعجبك "
ضحك باستفزاز وهو يبعد شعرو من على عينو " وانت من وقتاش تصرفت معايا تصرف يعجبني "
وقف والعصب ياكل فيه " يووووسف "
نفخ وهو ياقف ويقابلو " باش نجيك من الاخير....الاكاديمية ايلي قيدتني فيها بالسيف...باش نخرج منها بالسيف....اعمل ايلي تحب ...كلم معارفك...اصحابك ...تي حتى الباي بيدو....مستحيل نولي ضابط كيف ما انت تحب"
تبسم على جنب وهو يخرج ...قعد بوه واقف و يتبع فيه بخزرات موش مفهومين ....الشادلي شيشان ...من اعيان البلاد وكباراتها ...معروف انو قريب بارشا من جماعة الحزب وراجل عندو مكانة كبيرة ...اسمو برك يخلي الركب ترعش ...عندو زوز صغار ...يوسف ولدو الكبير ...و ازهار بنتو الصغيرة...ام يوسف توفات وهو عمرو اربعة سنين ...بعدها الشادلي عرس بالمرا الثانية وجاب منها ازهار ...ايلي عمرها وقتها في الاربعطاش ...اما ولدو البكر فكان عمرو عشرين ...صدر قرار من الباي انو كل حد يدخل ولدو للاكاديمية باش يكون عندو امتيازات خاصة بالنسبة ليه ولديوانو ....هاكي علاه وعلى جال المناصب بارشا من اعيان البلاد بعثو باولادهم للاكاديمية .
⭐✴✴⭐
تلمست شفايفها تتفقد في الروج عليهم وهي تخزر للمرايا قدامها ...كشبرت وقت راتو ياقف وراها ويخزرلها بعين مليانة حب ...تنهدت بصوت مسموع وهي تدورلو ...تبسم وقرب منها اكثر "زيينة "
نفخت بضيق "اوووف ...قتلك الف مرة ماتعيطليش زينة ...ماريا انا ...اسمي هو ماااااريا "
بل شفايفو بلسانو وخذى يدها بين صوابعو "باهي ...انت لاباس ...تحيرت عليك قالولي ولد الشادلي لبارح هزك من السان وخرجك على اكتافو بالسيف عليك "
لوت فهما ماعينهاش باش تحكي" خاطرو ولد الشادلي حد مانجم يتكلم ...في كل الحالات انا لاباس ...جاب ربي جاء واحد ولد حلال ومنعني منو "
أنت تقرأ
🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )
Aventura⭐الاسم " أكاديمية الباي العسكرية " ⭐الكاتبة" n🅾D🅰" ⭐النوع " اجتماعي، تاريخي ، حربي ، عائلي ، رومنسي ... ⭐الابطال " حذامي ...يوسف ...ابراهيم ...محمود... أسينات ...زينة ...محمد...راييس...نصر ...اسماعيل ...بية ..برندات ...طاهر ... ⭐تاريخ اول تنزيل "...
