🌺أكاديمية الباي العسكرية 💚🌺💚Bey Military Academy🌺(كرونيك باللهجة التونسية )

🌸الفصل الخامس عشر: مهمة اولى🌸

طريق كامل وهوما مرة يتناوشو ومرة يحكاو نرمال ومرة يضحكو لين وصلو للاكاديمية ...لقاو الباب  الحديد الكبير مشرع ع الفردتين عكس العادة وين كانت فردة برك تتحل ...خطوات اخرين وسمعو وراهم حس كميون كبير يدخل ،بعدو من قدامو وقعدو يثبتو فيه ...زعمة شنوة سبتو هذا ؟!...خزرو لبعضهم موش فاهمين ومن بعد كملو ثنيتهم .

حذامي" شنوة حكايتو ها الكميون !؟ "

عمر " علمي علمك .."

طلعو الدروج وكيف وصلو للكلوار ايلي باش يتفارقو فيه عرضهم يوسف ...لابس الزي متاعو وهاز سلاحو ...قعدو مبهمين فيه وايلي زاد على مابيهم  هو من راييس وصياد وهوما يقربو منهم  والزوز كيف كيف بزيهم وبسلاحاتهم ...الحكاية ماهيش نرمال ؟!

سألهم عمر  موش فاهم شي  " ياخا شفمة ...فمة تدريب الليلة ؟! "

جاوبو يوسف وهو  مثبت في حذامي وعينيه تلمع كيف الذيب "عمك لمين قالكم حضرو رواحكم الليلة عندكم مسيون في الجبل "

قرب منهم راييس "ياخا شبيكم لتوا ...موش على اساس ترجعو العشية ؟!"

حذامي بكل براءة "في بالنا عندنا وقت لنص الليل "
صياد وهو يشعل سيڨارو ويطفي عرف الوقيد قدام وجه حذامي " وشكون قالكم !؟...هاو احنا في بالنا العشية...علاش كان انتوما الزويز مافيبالكمش "

خزرت حذامي لعمر ايلي حال فمو ...توا وين فهمو الحكاية ...كيف جاو مروحين قبل بنهارين سألو نصر ع الوقت ايلي يرجعو فيه وهو سي الشباب ما قصرش الحق كذب عليهم وقالهم لنص الليل ....صرت سنونها بغل وتحلفت فيه اول ما تشوفو الا ماتنحيلو الكذب متاعو ...خزرت ليوسف لقاتو يتبسم بشماتة زادت شعلت نارها  ...تربثت ورعشت ركايبها وقت سمعت صوت  لمين من لوطة وهو يصيح "الكل للساااحة "

وكمل ختمها بتصفيرة طويلة قريب اطرشهم ...مااستنتش دقيقة من بعد وطول جرات لشومبر تبدل زيها ...علاش الزهر ديما عاكسها .؟!..مخها يخمم كان في حاجة وحدة تلبس فيسع فيسع وتهبط لوطة...ماتعرفش حتى كيفاش نحت دبشها وطيشتو كيف ماجاء ولبست في بلاصتو الزي و البوط متاعها وخرجت عجاجة ...وقت ايلي وصلت لقات الجماعة باش يطلعو للكماين المصففة ...وهكا نجمت تعرف سبة الكميون الكبير ايلي شافتو يدخل ..

كل واحد كانت في يدو والا في كرومتو  شركة معلقة فيها بلاكة صغيرة  محفور عليها نومرو وحروف صغيرة مشفرة وقبل مايطلعو للكماين يوروها لمحمود ...ظاهر فيها حاجة لازمة واذا مالقاهاش عندها باش تتعاقب ...ماعرفتش شنية هي بالضبط  ولا حتى  منين خذاوها !؟ ...قعدت حالة فمها واتبع فيهم بعين خايفة وتايهة ...المطر ظهرلها وقتها تولي تصب وزيد بالقوي ...لوجت بعينيها بين ايلي واقفين تشوفش حد من الجماعة ايلي تعرفهم ...مالقات حد ...الكل مكدسين على بعضهم وبداو يتنفخو ...تعبات عينيها بالدموع وماعرفتش شنوة تعمل ولا كيفاش تتصرف ...اول مرة تقعد عاجزة بالطريقة هاكي .