Darling! [norenmin]

4 - Do you love me?

where'd you go?
you said you would never leave me
All alone!
my heart is barely breathing
Like a ghost!
you hunt me everyday that you're gone

-Lovesick fool (The Cab)

ပိုင်ရှင်ဖြစ်သူရဲ့ စွန့်ပစ်ခြင်းခံထားရသော ပန်းချီခန်းသည် ညိုးရော်နေသော လီလီပန်းရနံ့များ အခရိုင်းလစ်၏ ပြင်းရှရှရနံ့များဖြင့် ပြည့်နှက်နေသည်။ ထို့နောက် ပန်းနုရောင် ကာနေရှင်းပန်းစည်းကို ကိုင်ထားသော လူတစ်ယောက်က လီလီပန်းများနေရာတွင် ကာနေးရှင်းကို အစားထိုးလိုက်သည်။ နံရံထောင့်တွင် ထပ်ထားသော ကင်းဗတ်စများကို ဖုန်သုတ်ပေးနေရင်း သူတို့ရဲ့ပိုင်ရှင်က ပစ်စလက်ခတ် လွှင့်ထားခဲ့သော စုတ်တံများကို တစ်ချောင်းချင်းစီ ကောက်ယူ သိမ်းဆည်းလိုက်သည်။

"ဂျက်စမင်နဲ့ ဒိုင်စီ ဘယ်ဟာပိုကြိုက်လဲ ဘေဘီ"

လက်ထဲမှ နံရံကပ်စက္ကူလိပ် နှစ်ခုကိုကြည့်၍ ရွေးချယ်ရခက်ဟန် မေးလိုက်သည်။ သို့သော် တိတ်ဆိတ်နေသော အခန်းတွင်းတွင် တုန့်ပြန်မှုဟူ၍ လေတိုးသံပင်မရှိ။

ထိုသူက အပေါ်ဝတ်အင်္ကျီကို ချွတ်လိုက်သောအခါ တောင့်တင်းသန်မာသော လက်မောင်းကြွက်သားများ ပေါ်ထွက်လာသည်။ လေးလံသော ပန်းချီကားဘောင် အထပ်လိုက်ကို အပန်းမကြီးသကဲ့သို့ ပင့်မလိုက်သောအခါ ညှပ်ရိုးများသည် ချောမွတ်ပြေပြစ်သော ရွေ့လျားမှုတစ်ခုအတိုင်း လှုပ်ရှားသွားသည်။ ရွှေအချိုးရှိသော ပန်းပုရုပ်ကဲ့သို့ ပြေပြစ်ကျစ်လစ်သော ခန္ဓာကိုယ်၊ ရှည်သွယ်သောအရပ်နဲ့ ထက်ရှနေသော မေးရိုးရှိသည့် ထိုအမျိုးသားက စွပ်ကျယ်လက်တို တစ်ထည်ဝတ်လျက် လေးပင်သောအလုပ်များကို လုပ်ကိုင်နေသည်။ သူ့ရဲ့ အပြစ်အနာဆာမဲ့သော အသားအရည်က ချွေးစက်များကြောင့် ပြောင်လက်နေပြီး အားစိုက်ထုတ်ရသော လှုပ်ရှားမှုတစ်ခု ပြုလုပ်လိုက်တိုင်း သွေးကြောစိမ်းများ ထင်းထွက်လာသည်။

နာရီအနည်းငယ်ခန့် ကြာသောအခါ အခန်းတစ်ခုလုံးသည် လုံးဝ မမှတ်မိလောက်အောင် ပြောင်းလဲသွားသည်။

အဝါနုရောင်အောက်ခံတွင် အဖြူရောင် ဒိုင်စီပွင့်လေးများ ပြန့်ကျဲနေပုံရသော နံရံကပ်စက္ကူက အခန်းထဲရှိလေထုကို နွေးထွေးတက်ကြွစေသည်။ စာအုပ်အချို့နဲ့ ပန်းချီပစ္စည်းများ တင်ထားသော သုံးထပ်စင်များမှာ အရောင်တင်ဆေးဖြင့် တိုက်ချွတ်ခံထားရပြီး ထိုအပေါ်တွင် ကာနေးရှင်းပန်းအိုးများက နေရာယူထားသည်။ သူက လက်နှစ်ဖက်ကိုခါလျက် အသစ် ပြင်ဆင်ထားသော အခန်းကို တစ်ချက်ကြည့်လိုက်သည်။