Darling! [norenmin]

33 - His broken self

Nothing isn't
better or worse than Anything.
Nothing is just nothing.

-Arya Stark (Game of Thrones)

ကျန်ခဲ့သည့််နှစ်ယောက်က အလျင်စလိုထွက်သွားသော ရန်ကျွင်ရဲ့ နောက်ကျောကိုကြည့်၍ အချင်းချင်း မျက်စောင်းခဲသည်။ သူတို့ရဲ့မျက်နှာထက်ရှိ သဘောထားမှာ တူညီသည်။ တစ်ယောက်ကိုတစ်ယောက် အပြစ်တင်နေခြင်း ဖြစ်သည်။ ဂျဲယ်မင်က အစာအိမ်ဆေးကို ရေအေးဖြင့်သောက်ပြီးနောက် အပေါ်ဝတ်အင်္ကျီယူကာ ဂျဲနိုကိုအပြင်မှာ စောင့်ခိုင်းလိုက်သည်။

အပြင်ဘက်တွင် နေပူရှိန်ကလျော့မသွား။ ထီးတစ်ချောင်းဖြင့် ထွက်လာသော နာဂျဲယ်မင်ကိုမြင်သောအခါ ဂျဲနိုမှာ မဝေဖန်ဘဲမနေနိုင်။

"ငါတို့က ခြေကျင်သွားမှာမဟုတ်ဘူးနော် အဲ့လောက်ထိ နုရွနေဖို့လိုလို့လား ဂျဲယ်မင်မမလေး"

ဂျဲယ်မင်က ဘာစကားမှပြန်မပြော။ ထီးအောက်ဝင်လာသော ဂျဲနိုကိုတွန်းထုတ်ကာ ခပ်ခွာခွာ လမ်းလျှောက်သွားသည်။

အဆောင်ခန်းနေရာသို့ သူတို့ရပ်ကွက်မှသွားလျှင် ပုံမှန်အမြန်နှုန်းဖြင့် နှစ်နာရီကျော်ကျော်ခန့် အချိန်ယူရသည်။ အဆောက်အဦး တည်နေရာများက လွန်ခဲ့တဲ့ခုနှစ်နှစ်နဲ့ မတူညီတော့နိုင်။ သို့သော် တူညီသောနေရာဖြစ်နေသ၍ နာဂျဲယ်မင်အတွက် တစ်စုံတစ်ရာ မှတ်မိလာစေရန် အခွင့်အရေးရှိသေးသည်။ တိုက်ခန်းပိုင်ရှင် ကလေးစုတ်လေးထံမှ ခွင့်ပြုချက်ရပြီးဖြစ်၍ ဂျဲနိုက ဂျဲယ်မင်ကိုခေါ်ကာ ခေါင်မိုးထပ်သို့တက်ခဲ့သည်။

ခေါင်မိုးထပ်တွင် လေတဖြူးဖြူးတိုက်လျက် တစ်ဖက်ခြမ်းတွင် လူနေအိမ်နိမ့်လေးများကို ငုံ့ကြည့်နိုင်ပြီး ကျန်တစ်ဖက်တွင် သူ့ထက်မြင့်သော အဆောက်အဦးများက နောက်ခံထားသည်။ ဤနေရာမှကြည့်လျှင် မလှမ်းမကမ်းရှိပန်းခြံမှ ထိုးထွက်နေသော ချားရဟတ်ဘီးကို လှမ်းမြင်နိုင်ပြီး ချိတ်ပိတ်ထားသော စူပါမားကတ်တစ်ခုလည်း ရှိသည်။ ခေတ်ကာလရွေ့လျားမှုကြောင့် မြို့ရဲ့အချို့နေရာများတွင် လူစည်ကားလာချိန်တွင် အချို့နေရာများက တိတ်ဆိတ် ခြောက်ကပ်သွားသည်မှာ ပုံမှန်သာဖြစ်သည်။