Darling! [norenmin]

65 - Payback

"If you make a mistake, apologize
If you owe a debt, payback"

ရန်ကျွင်ရဲ့ နေ့စဥ်ဘဝတွင်။

ဖီလစ်ပိုင်-အမေရိကန် ကောင်လေးက နောက်ထပ် ပေါ်မလာတော့ပေ။ ယခုတစ်ယောက်မှာ မျက်နှာတည်ကြီးနဲ့ စကားအပိုမပြောသော အဒေါ်ကြီးဖြစ်သည်။ ရန်ကျွင်မှာ တစ်ယောက်ထဲ တီဗွီကြည့်လိုက် ဂိမ်းဆော့လိုက်ဖြင့် ပျင်းပြီးရင်း ပျင်းနေတော့သည်။

ယခုလည်း ထုံးစံအတိုင်း ဂိမ်းဆော့နေစဥ်။

အခန်းအပြင်ဘက်မှ လူတစ်ယောက်ထက်ပိုသော ခြေသံများ ထွက်ပေါ်လာသည်။ ရန်ကျွင်က နားကြပ်ကိုချွတ်ကာ သတိအနေအထားနဲ့ တံခါးဝသို့ ကြည့်လိုက်သည်။ ဒေါက်တာဖြစ်စေ၊ ထမင်းပို့သူဖြစ်စေ တစ်ယောက်ထဲသာ လာကြသည်။ ထို့ကြောင့် လူအုပ်စုသည် ပုံမှန်မဟုတ်နိုင်။

တံခါးတစ်ပေါက်ထဲသာရှိသော အခန်းတွင်းတွင် တစ်ယောက်ယောက် ဝင်လာပါက ခုခံနိုင်စွမ်း သုညဖြစ်သည်။ ဒါတောင် လူအရေအတွက်နဲ့ လက်နက်တွေကို ထည့်မတွက်ရသေး။

အခန်းပြင်တွင် လူများစွာ ရပ်နေကြသော်လည်း ဝင်လာသူမှာ တစ်ယောက်ထဲသာ ဖြစ်သည်။ နံရံတွင်ကျောကပ်လျက် သတိချပ်နေသော ရန်ကျွင်မှာ ထိုလူကိုမြင်မြင်ချင်း ခြေထောက်များ ပျော့ခွေသွားရသည်။ ရန်ကျွင်ရဲ့ အောက်နှုတ်ခမ်းသည် တဆတ်ဆတ်တုန်ယင်လျက် ခပ်မဲ့မဲ့ဖြစ်လာသည်။ ပြောလိုသော စကားများစွာက လည်ချောင်းဝတွင် တစ်ဆို့လျက် ရွေ့လျားလိုသော ခြေလှမ်းများမှာ ကျောက်ရုပ်ကဲ့သို့ပင်။

"ဒါလင်..."

ဂျဲနိုက ခြေလှမ်းကျဲကျဲလျှောက်ကာ စက္ကန့်ပိုင်းအတွင်း ရန်ကျွင်ရဲ့ကိုယ်ကို သိမ်းယူပွေ့ဖက်လိုက်သည်။ ရန်ကျွင်မှာလည်း ဂျဲနိုရဲ့လည်ပင်းထက် လက်နှစ်ဖက်ခိုလျက် တစ်ကိုယ်လုံးရဲ့ အလေးချိန်ဖြင့် မှီတွယ်ထားသည်။ နှစ်ယောက်သား ပွေ့ဖက်ထားပုံမှာ ကွဲကွာနေသော ဝင်ရိုးစွန်းနှစ်ခု ချိတ်ဆက်မိသကဲ့သို့ လေပင်မတိုးသာတော့။ ရန်ကျွင်သည် အခြားစကား မပြောနိုင်တော့ဘဲ ဂျဲနိုကိုသာ ထပ်တလဲလဲခေါ်သည်။