Darling! [norenmin]

11 - Curious cutie in trouble

My heart is covered black,
your place.
Your heart is brunt white,
my place.
Of course you can't get sick of
this play play play play.

-Playboy (EXO)

ကမ္ဘာရဲ့အခြားတစ်ဖက်ရှိ ဒေါက်တာနာမှာ သူ့ကြောင့် ဖြစ်ပျက်နေသော ပဋိပက္ခများကိုမသိ။ အေးဆေးစွာပင် ဆေးခန်းလေးဖွင့်လိုက် ဘလက်ကော်ဖီလေး သောက်လိုက်နဲ့ အချိန်ရင်ရသလို ပန်းပင်များအား ရေလောင်းရသေးသည်။ သူ့ရဲ့အာရုံကို လာနောက်စေမဲ့ ရန်ကျွင်လည်းမရှိ၊ ခဏခဏ နားပူနားဆာလုပ်မဲ့ အန်းယူရီကလည်း အလုပ်ကိစ္စနဲ့ တိုကျိုရောက်နေသည်။ နေ့ရက်များမှာ ငြိမ်းချမ်းလှသည်။

လူတိုင်းရဲ့ နာဂျဲယ်မင်အပေါ် ပထမဆုံးထင်မြင်ချက်မှာ တိတ်ဆိတ်၍ အေးဆေးသည်။ သီးသန့်ဆန်ကာ အများနဲ့သဟဇာတမရှိ ဟူ၍ဖြစ်သည်။ သို့သော် ထိုသူအကြောင်း သေချာသိလာသောအခါ ပြောဆိုဆက်ဆံရ လွယ်ကူသူမှန်း သိမြင်လာကြသည်။ တစ်ရာတွင် ကိုးဆယ်ရာခိုင်နှုန်းခန့် တစ်ဖက်လူအပေါ် လိုက်လျောပေး၍ အသေးအဖွဲကိစ္စများကို လစ်လျူရှုပေးသည်။ သူ့အပေါ် ကောင်းစွာဆက်ဆံသူတိုင်းကို အပိုအလိုမရှိ ယဥ်ကျေးစွာတုံ့ပြန်သည်။ ခြုံငုံပြောရလျှင် လူကောင်းလေး ဖြစ်သည်။

ဤနေရာတွင် ခြွင်းချက်တော့ ရှိသည်။ ကျန်ဆယ်ရာခိုင်နှုန်းဖြစ်သော ခေါင်းမာသော၊ အပြောအဆိုရင့်သီးသော၊ ​ရှေ့နောက်မကြည့် လုပ်ချင်ရာလုပ်သော နာဂျဲယ်မင်ကို ရင်ဆိုင်ရသူများမှာ ရှားရှားပါးပါး ကံဆိုးသူများပင်။ တစ်စုံတစ်ယောက်က သူ့ကိုတစ်ကြိမ် နှောင့်ယှက်မိသည်နဲ့ တစ်သက်လုံးစာ ဒေါက်တာနာရဲ့ နာမည်ပျက်စာရင်းထဲ ထည့်သွင်းခံရမည်။

ဆေးခန်းတံခါးဝတွင် လူရိပ်မြင်သောကြောင့် ဂျဲယ်မင် ခေါင်းမော့ကြည့်လိုက်သည်။ ပထမဆုံးတွေးမိသည်မှာ ရှီဒိုလည်း ဒဏ်ရာရလာတာလား ဟူ၍ဖြစ်သည်။ သို့သော် တစ်ဖက်လူက ခြေအကောင်း လက်အကောင်းရှိနေသဖြင့် ဆေးခန်းလာပြတာ မဖြစ်နိုင်။ သူ့ကို အရှုပ်ထုပ်များလာပေးတာ ဖြစ်နိုင်သည်။

"ထိုင်ပါ"

လူကရောက်နေပြီ ဖြစ်သောကြောင့် ကြိုက်သည်ဖြစ်စေ မကြိုက်သည်ဖြစ်စေ ကြိုဆိုရမည်။ အသက်အရဖြစ်ဖြစ် ဝါစဥ်အရဖြစ်ဖြစ် ရှီဒိုကို မဖြစ်မနေ သည်းခံပေးရမည်။