Darling! [norenmin]

Extra ( Renmin )

Until morning,
Don't wake up yet.
Time keeps tearing us apart.

-Mirage-

"ဟိတ်!"

နာဂျယ်မင် နောက်လှည့်ကြည့်လိုက်သည်။ သူ့ခေါင်းကိုလာမှန်တဲ့ စက္ကူလုံးသည် ပြောင်လက်နေသော ကော်ရစ်တာကြမ်းခင်းပေါ်သို့ တစ်ခုတည်းသောအမှိုက်အဖြစ် ကျဆင်းသွားသည်။ အမှိုက်ကိုပစ်သူက နာဂျယ်မင်အား ပြောင်ချော်ချော်မျက်နှာပေးဖြင့် ရိထေ့ထေ့ကြည့်သည်။

နာဂျယ်မင်က ထိုသူကိုသိသည်။ အခန်းမတူသော်လည်း အတန်းတူသည့်အပြင် တစ်ကျောင်းထဲဖြစ်၍ မျက်မှန်းတန်းမိသည်။ သို့သော် မရင်းနှီးလှပေ။ အနှီကျောင်းသားမျိုးက 'ဘယ်သူ့ကိုမှဂရုမစိုက်သလို ဘယ်သူကမှလည်း ဂရုမစိုက်' ဟူသည့် အမျိုးအစားထဲတွင် ပါဝင်သည်။ အဆိုးဝါးကြီးမဟုတ်သလို ဆရာဆရာမ မျက်မှန်းတန်းမိအောင်လည်း အကောင်းထဲမပါဝင်။ အတန်းသားတွေနဲ့ ချောချောမွေ့မွေ့ ဆက်ဆံနိုင်စွမ်းမရှိ။ လျှို့ဝှက်ချက်များစွာနဲ့ ရန်သွားစရန်မသင့်သော သင်းကွဲတစ်ယောက်သဖွယ် 'လေလွင့်' နေတတ်သူမျိုးဖြစ်သည်။ ကျောင်းမှာ အဲ့လိုမျိုးကြောင်တောင်တောင်နိုင်တဲ့ သင်းကွဲအုပ်စုလေးတွေ အများအပြားရှိသည်။

သူက စက္ကူလုံးကိုကောက်ကာ အမှိုက်ပုံးထဲထည့်သည်။ ထို့နောက် လက်ဆေးရန်အတွက် ယောက်ျားလေးသန့်စင်ခန်းသို့ ဦးတည်သည်။ သူ့ကိုစိုက်ကြည့်ရင်း ကျန်ခဲ့ရှာသော အနောက်ကတစ်ယောက်ကိုတော့ လစ်လျုရှုလျက်။

လူကို မိုက်ကြေးခွဲသလိုလာလုပ်ပြနေသော ကောင်စုတ်လေးမှာ အရပ်ကသိပ်မရှည်၊ လူကောင်ကသေးသေးလေး၊ မျက်နှာက အလယ်တန်းသာသာ ကလေးရုပ်မပျောက်သေးဟန်နဲ့။ ဒီလောက်ဗလလေးနဲ့ သူများတကာကို ရန်စရဲတာ အံ့သြလို့မဆုံးပေ။ နာဂျယ်မင်သည် စကားနည်းရန်စဲသမားဖြစ်၍ မိမိအပေါ်တရားမလွန်သရွေ့ သည်းခံပေးနိုင်သည်။ ဒေါသကြီးတတ်သော တစ်ယောက်ယောက်အပေါ် ထိုသို့သွားလုပ်မိပါက အနှီလူရှုပ်လေးတော့ ပြသနာများလိမ့်မည်ဟု ခံစားနေရသည်။ လက်ဆေးပြီးပြန်ခဲ့တော့ လူရှုပ်လေးကို ကော်ရစ်တာမှာ မတွေ့ရပေ။ အတန်းပုံမှန်မတက်တဲ့ ကျောင်းသားဆိုးတိုင်းမှာ ပုန်းအောင်းစရာ လျှို့ဝှက်နေရာတွေရှိသည်ဟု ကြားဖူးသည်။ နာဂျယ်မင်ကတော့ 'ကျောင်းသားဆိုး' ဟူသောခေါင်းစဥ်နဲ့ အလှမ်းဝေးလွန်းသည်။