Darling! [norenmin]

55 - A broken butterfly

Will a butterfly be painful
with its wings being cut off?

အချိန်က မနက်ခင်းဟုပင်ပြော၍မရ နေ့ခင်းမွန်းတည့်သို့ ရောက်လုနီးနီးတွင်။

လီဂျဲနိုသည် ဧည့်ခန်းရဲ့အလယ်ထိုင်ခုံတွင် ဘာမှလုပ်ရန် အစီအစဥ်မရှိသကဲ့သို့ ငုတ်တုပ်ထိုင်နေသည်။ မည်မျှအထိ သတိလက်လွတ် ဖြစ်နေသလဲဆိုရင် တံခါးကိုဖြတ်ဝင်လာတဲ့ နာဂျဲယ်မင်ကိုပင် မမြင်ခဲ့ပေ။ ဂျဲယ်မင်က ဂျဲနိုရဲ့မျက်နှာရှေ့တွင် လက်ဖျောက်တီးလိုက်သည်။

"ဟေး မနက်စာစားပြီးပြီလား"

ဂျဲနိုက ထူးမခြားနားမျက်နှာထားနဲ့ မော့ကြည့်ကာ ခေါင်းယမ်းပြသည်။

"စားစရာမရှိဘူး"

အကျိုးအကြောင်းမသင့်တဲ့ ထိုအဖြေကြောင့် နာဂျဲယ်မင်မှာ ထူးဆန်းတဲ့မျက်နှာထား ဖြစ်သွားရသည်။ ဘာလုပ်ရမှာလဲ သူ့ကို ရှာကျွေးစေချင်တာလား?

"ဝယ်ထားတာမရှိဘူးလား ရေညှိဖြစ်ဖြစ် ကြက်ဥဖြစ်ဖြစ်"

ဂျဲနိုတွင် တုံ့ပြန်စကားမရှိ၊ ထိုင်ခုံပေါ် ဒူးပိုက်ထားလျက် မတုန်မလှုပ်ထိုင်နေသည်။ လီဂျဲနိုရဲ့ ပေတိပေကြောင်နဲ့ ကလေးဆန်သော တစ်ဖက်ခြမ်းကို မြင်တွေ့လိုက်ရသော နာဂျဲယ်မင်မှာ အံ့သြမဆုံးနိုင်တော့ပေ။

"လူကြီးလူကောင်းက မီးဖိုဆောင်နဲ့ မပတ်သက်ရဘူး"

သူက တစ်ခဏကြာပြီးမှ ပြန်ပြောစရာစကား ရှာတွေ့သကဲ့သို့ ဖြည်းဖြည်းချင်းဖြေသည်။ သို့သော် အရှေ့နဲ့အနောက် စုံလင်နှံ့စပ်သော နာဂျဲယ်မင်နဲ့ ပြိုင်မငြင်းနိုင်သေးပေ။

"အဲ့ဒီအဆိုက ယောက်ျားတွေကို အိမ်တွင်းရေး မစွက်ဖက်ရဘူးလို့ပြောတာ မချက်ပြုတ်ရဘူးလို့ ပြောတာမဟုတ်ဘူး"

ဂျဲယ်မင်က ဂျဲနိုကိုစိုက်ကြည့်လျက် မီးဖိုခန်းဘက်သို့ မေးငေါ့ပြသည်။ လီဂျဲနိုသည် ရန်ကျွင်မရှိသောအချိန်တွင် သူ့ဘာသာ နေထိုင်စားသောက်ရန် သင်ယူသင့်သည်။

"ရန်ကျွင်ကပြောတယ် ငါနောက်တစ်ခါ ဂတ်စ်မီးဖိုကို ဖောက်ခွဲမိရင် သူအိမ်ပေါ်ကဆင်းမယ်တဲ့"