Darling! [norenmin]

39 - Into the darkness

Stars, hide your fires,
Let not light see
my black and deep desires.

-Macbeth (Shakespeare)

လေးဘက်လေးတန် နံရံအပြည့်ကာထားပြီး ပြတင်းပေါက်မရှိသော အခန်းကျဥ်းထဲတွင်။

ဆယ်ပေပတ်လည် အခန်းကျဥ်းလေးက တစ်ယောက်အိပ်ကုတင်၊ စားပွဲတစ်လုံး၊ ထိုင်ခုံတစ်လုံးဖြင့် နေရာလွတ်မကျန်ခဲ့။ တစ်ခုထဲသော တံခါးချပ်မှာ လျှို့ဝှက်နံပါတ်ရိုက်၍ ဖွင့်ပိတ်ပြုလုပ်နိုင်သော သတ္ထုတံခါးဖြစ်သည်။ အခန်းကျဥ်းကျဥ်း မီးရောင်မှိန်မှိန်က မွန်းကြပ်ပိတ်လှောင်သော ခံစားချက်ကိုပေးပြီး တစ်ဖက်နံရံမှ အပြင်အဆင်များနဲ့ ပေါင်းစပ်လိုက်သောအခါ ရူးသွပ်ဖွယ်ပင်။

နံရံကပ်ထားသော ဘုတ်ပြားအဖြူရောင်တွင်။

ဖြတ်ညှပ်ကပ်ထားသော ဓာတ်ပုံအပိုင်းအစများ၊ မှတ်စုစာရွက် သေးသေးလေးများ အပြည့်ကပ်ထားပြီး တစ်ခုချင်းစီအောက်တွင် ရက်စွဲနဲ့မှတ်ချက် ရေးမှတ်ထားသည်။ မှုခင်းတစ်ခုဖြေရှင်းနေစဥ် အရေးကြီး အချက်အလက်များနဲ့ သဲလွန်စအားလုံးကို မြင်သာအောင် စုစည်းထားသကဲ့သို့ အစီအစဥ်ကျနသည်။

အခန်းတွင်းရှိလူက လက်ဖဝါးထဲမှ ကြေးဝါနာရီအိမ်ကို ငုံ့ကြည့်လိုက်သည်။ နာရီကြိုးရဲ့ ဆန့်ကျင်ဘက် အစွန်းတစ်ဖက်ကို ပွင့်ဖတ်ထူထူလေးခုပါ ပန်းတစ်ပွင့်ပုံစံဖြင့် အဆုံးသတ်ထားသည်။

'ပန်းတိုင်းမှာ ပန်းဘာသာစကားဆိုတာ ရှိတယ်။ ဥပမာ kinmokuseiလို့ခေါ်တဲ့ ရွှေရောင်သံလွင်ပွင့်ကို 'အမှန်တရား၊ တော်ဝင်မြင့်မြတ်မှု' လို့ အဓိပ္ပါယ်ကောက်ကြတယ်'

ထို့နောက် နာရီကြိုးနဲ့အိမ်ကို ဘုတ်ပြားပေါ်တွင် တိတ်ဖြင့်ကပ်လိုက်သည်။ အစွန်းဘက်ရှိ သံလွင်ပွင့်လေးမှာ အောက်သို့တွဲလွဲကျနေပြီး ကြေးကြိုးနဲ့ရိုက်ခတ်မိသော အသံလွင်လွင် ထွက်ပေါ်နေသည်။

"ပြီးတော့ နောက်ထပ်အဓိပ္ပါယ်တစ်ခု ရှိသေးတယ်။ ရွှေရောင်သံလွင်ပွင့်က 'အချစ်ဦး' ဒါမှမဟုတ် 'အချစ်စစ်'ကို ကိုယ်စားပြုတယ်တဲ့'

မှတ်စုစာရွက်တွင် လက်ရေးသော့သော့ဖြင့် အချစ်ဦးဟု အမည်တပ်လိုက်သည်။