Darling! [norenmin]

29 - Doctor can bite

In the troubling days
for the never-smiling you.
I give my utmost love in hopes
for the dazzling tomorrow.

-Racing into the Night (YOASOBI)

ရေခဲမတတ်အေးစက်နေသော ရေပန်းမှရေက ထူပူနေတဲ့ဦးနှောက်အတွက် အကူအညီဖြစ်စေလိမ့်မည်။ ဟင့်အင်း ဖြစ်ချင်မှလည်း ဖြစ်လိမ့်မည်။

မှန်ထဲတွင်ပေါ်နေသော သူ့ကိုယ်ပိုင်ပုံရိပ်နဲ့ သူ့ကိုယ်သူ နဖူးချင်းထိကပ်ထားလိုက်သည်။ ယခုလက်ရှိတွင် တခြားဘယ်သူကမှ သူ့ကိုမကူညီနိုင်မှန်း ရန်ကျွင်သိထားသည်။ ဘာအကူအညီမှမရှိသလို ဘယ်လိုဖြေရှင်းချက်မှလည်း မရှိခဲ့။ ထိန်းချုပ်မှုလွတ်နေသော လေယာဥ်တစ်စီးကဲ့သို့ အကောင်းဆုံးကိုမျှော်လင့်လျက် အဆိုးဆုံးလမ်းသို့ ဦးတည်နေတော့သည်။

ယနေ့မနက် ဟင်ဒရီပြောခဲ့သောစကားများက သူ့ခေါင်းထဲ ဝဲလည်နေသည်။

'နာဂျဲယ်မင်က တဖြည်းဖြည်းပြန်မှတ်မိနေပြီ'

မှတ်မိနေတယ်။ ဖြည်းညှင်းသည်ဖြစ်စေ မြန်ဆန်သည်ဖြစ်စေ သေချာတာကတော့ အချိန်အကန့်အသတ် တစ်ခုသာဖြစ်သည်။ ထိုအချိန်ကန့်သတ်ချက်က သူ့အတွက်လည်း အကျုံးဝင်သည်။ အတိတ်ကသူလုပ်ခဲ့သော အမှားများကိုဖော်ထုတ်ကာ တရားစီရင်ခံရရန် အပြစ်ပေးခံရရန် နေ့ရက်များမဝေးတော့ဟု အဓိပ္ပါယ်ရသည်။ သို့သော်သူက အဆင်သင့်မဖြစ်သေးပေ။

"ပြီးတော့ ဒါလင်ကလည်း ကူညီပေးနေတယ်တဲ့ ဟား... သူတို့ဘယ်တုန်းက အဲ့လောက် ဆက်ဆံရေးကောင်းသွားတာလဲ ငါ့အတွက် အခေါင်းပြင်ပေးနေကြတာလား"

ရန်ကျွင်က မှန်ထဲမှပုံရိပ်ကိုကြည့်ကာ သူ့ကိုယ်သူစကားပြောသည်။

စီးကျနေသော ရေစက်များအောက်တွင် အဝတ်အစားများမှာ အသားနဲ့ကပ်နေပြီး ခေါင်းအစ​ခြေအဆုံး စိုစွတ်လျက်။ လွှမ်းခြုံလာသော အအေးဓာတ်ကြောင့် နှုတ်ခမ်းများပြာနှမ်းပြီး တစ်ချက်တစ်ချက် တုန်ယင်လာသည့်တိုင် ဂရုမမူနိုင်ခဲ့ပေ။ သူ့နှလုံးသားက စိုးရိမ်ကြောင့်ကြစိတ်ဖြင့် လောင်ကျွမ်းနေခဲ့သည်။

'ဂျဲနိုကရော အဲ့လောက်ထိစေတနာကောင်းပြီး စိတ်ကောင်းရှိနေလို့လား။ သူကသူ့အပေါ် အမှားလုပ်ဖူးတဲ့သူမှန်သမျှကို ခွင့်လွှတ်မယ်ထင်လား။ နာဂျဲယ်မင်ကို ကူညီချင်ယောင်ဆောင်ပြီး ရသမျှအချက်အလက်ကို ယူလိမ့်မယ် ပြီးတော့သူကအရင် လှုပ်ရှားလိမ့်မယ်။ နာဂျဲယ်မင်အတွက် အရေးအကြီးဆုံးအရာကို သူ့လက်ထဲမှာထားပြီး မျက်စိရှေ့မှာ ဖျက်စီးပြလိမ့်မယ်'