Darling! [norenmin]

31 - A risky fun

Someone told me stay away
from things that aren't yours
But was he yours,
if he wanted me so bad?

-Pacify her (Malanie Martinez)

နာဂျဲယ်မင်သည် ကြိုးလျော့လျော့ချည်ထားသော ညအိပ်ဝတ်စုံ၊ ဖရိုဖရဲဆံပင်တို့ဖြင့် ရေခဲသေတ္တာထဲမှ ဂျယ်လီတစ်ချောင်းကိုက်လျက် ခြေချိတ်ထိုင်နေသည်။

သူ့ရှေ့တွင် သူများအိမ်ထဲသို့ လူအိပ်ချိန်မှန်းမသိ စွတ်ရွတ်ဝင်လာသော တစ်စုံတစ်ယောက်ရှိနေပြီး ထိုသူက ခေါင်းငိုက်စိုက်ကျလျက် ထိုင်နေသည်။ အရင်တစ်ခေါက်ကလို သော့ဖျက်ပြီး ဝင်လာတာနဲ့စာရင် အခုတစ်ကြိမ် တံခါးခေါက်ရမှန်းသိတာက အများကြီးယဥ်ကျေးနေပြီဟု ပြောလို့ရသည်။ ဂျဲယ်မင်က ကုန်သွားသောဂျယ်လီချောင်းကို အမှိုက်ပုံးထဲလွှင့်ပြီးနောက် အပူချိန်တိုင်းစက်တစ်ခု ထုတ်ယူလိုက်သည်။

ထို့နောက် ဂျဲနိုရဲ့ မျက်ခုံးကြားထဲသို့ချိန်ကာ အပူချိန်တိုင်းလိုက်သည်။ မှားယွင်းနေခြင်းမရှိ ပုံမှန်ပင်။

ဂျဲနိုထံမှ အရက်နံ့လည်းမရ၊ ဖျားနေခြင်းလည်မဟုတ် ဒါဆိုဘာကြောင့်များ လီဂျဲနိုမဟုတ်သကဲ့သို့ ထူးထူးဆန်းဆန်းပြုမူနေသလဲ သူနားမလည်နိုင်ပေ။ ထိုကောင်ရဲ့ခေါင်းကို တစ်ယောက်ယောက်က အပေါက်ဖောက်သွားသလား သိချင်မိသည်။ လီဂျဲနိုက ငြိမ်သက်သွားပြီး သူ့ဒေါသကလည်း အနည်ထိုင်သွားပြီဟု ယူဆရသောအချိန်တွင် စကားပြန်ဖြေလိုက်သည်။

"ဟုတ်တယ် မင်းအိမ်ကိုရောက်ခဲ့တယ် ရန်ကျွင်ကခေါင်းကိုက်ကိုက်နဲ့ အိမ်ပြန်သွားပြီး မနက်စာလည်းမစားဘူးကြားလို့ လိုက်သွားကြည့်တာ"

ပြောရင်းနဲ့ ပခုံးတွန့်ပြလိုက်သည်။ ထိုကိစ္စက လီဂျဲနိုကိုပျာယာခတ်လျက် ဝုန်းဒိုင်းကြဲနေစေမယ်လို့ ထင်မထားခဲ့။

"ဒါပေမဲ့..." ဂျဲနိုက အထွန့်တက်သည်။

ရန်ကျွင်ဘာပဲဖြစ်နေနေ နာဂျဲယ်မင်စိတ်ပူရမဲ့ ကိစ္စမဟုတ်သလို ဝင်ပါစရာလည်းမလို။ သူတစ်ယောက်လုံး သက်ရှိထင်ရှားရှိနေ၍ သူနဲ့သာဆိုင်သည်။

"ဒါပေမဲ့ဘာလဲ မင်းကအိမ်မှာရှိမနေဘူးလေ သူတစ်ယောက်ထဲ နေမကောင်းဖြစ်နေခဲ့ရင် ဘယ်လိုလုပ်မလဲ"