Darling! [norenmin]

68 - Wedding Bells

ဖေဖော်ဝါရီလရဲ့ မနက်ခင်းသည် ခေါင်းလောင်းငယ်များ တီးခတ်သံနဲ့ စတင်ခဲ့သည်။

လွန်ခဲ့တဲ့အချိန်များက နာဂျယ်မင်အတွက် La Campanellaသည် ငရဲမှလာသော နတ်ဆိုးတီးလုံးကဲ့သို့ မျှော်လင့်ချက်ကင်းမဲ့မှုကို ကိုယ်စားပြုသည်။ ယခုတော့ ခေါင်းလောင်းတီးသံသည် မင်္ဂလာအခမ်းအနားကို ဖော်ကျူးပြီး LaCampanellaကို အချစ်ရဲ့တေးသွားအဖြစ် အမှတ်ရနေတော့မည်။

လက်ထပ်ပွဲအကြောင်း သတင်းထွက်တဲ့နေ့မှစ၍ အမှန်တကယ် ဖြစ်လာသည်ထိ မယုံတစ်ဝက်ယုံတစ်ဝက် စောင့်ကြည့်နေသူ အများအပြားရှိခဲ့သည်။ ဥပမာတစ်ချို့က ရှယ်ယာစျေးတက်ရန် သတင်းလွှင့်သည်ဟု ထင်ကြသည်။ တစ်ချို့ကလည်း အရင်အိမ်ထောင်ဖက်နဲ့ ဘယ်လိုအဆုံးသတ်လဲ ဆိုတဲ့အချက်ကို ပိုသိချင်ကြသည်။

အကြီးအကျယ် သစ္စာဖောက်ခံရသည်ဟု ခံစားရသူမှာ လီဟယ်ချန်းဖြစ်သည်။ ယခင် လီဂျဲနိုနဲ့နာဂျယ်မင် အတင်းအဖျင်းများ ထွက်ခဲ့စဥ်က သူက ဒိုင်ခံငြင်းပေးခဲ့သည်။ ယခုတော့ ထိုနှစ်ယောက် တရားဝင်ဖြစ်သွားခြင်းက သူ့မျက်နှာကို ဖြတ်ရိုက်သကဲ့သို့ပင်။

ကိုယ်တိုင်ဝင်မပါရပေမဲ့ ထပ်တူထပ်မျှ စိတ်လှုပ်ရှားနေသူလည်း ရှိသည်။ ရန်ကျွင်က ဧည့်သည်များအတွက် နေရာချထားသော စားပွဲဝိုင်းတွင် ဟယ်ချန်းနဲ့အတူ ထိုင်နေသည်။

"တွေ့လား တွေ့လားဒီပုံမှာ ဒါလင်ကြည့်နေတဲ့ပုံစံက အရမ်းမိုက်တာပဲ အကြည့်နဲ့စကားပြောတယ်ဆိုတာ ဒါမျိုးကိုခေါ်တာ"

ထို့နောက် ဂျဲနိုနဲ့ဂျယ်မင်ရဲ့ အကြိုဓာတ်ပုံများကို မပြီးနိုင်မစီးနိုင် ထုတ်ကြွားနေသည်။

"ပြီးတော့ဒီပုံမှာ ဂျယ်မင်ကရှက်နေတာထင်တယ် နားရွက်တွေနီနေရော"

ဟယ်ချန်းက ရန်ကျွင်ကို ထူးထူးဆန်းဆန်း ကြည့်လိုက်သည်။ ဒီကောင်က အခုချိန်လောက်ဆို အခန်းထဲအောင်းပြီး မျက်ရည်နဲ့မျက်ခွက် ဖြစ်နေရမှာ မဟုတ်ဘူးလား။ ဘယ်လိုတောင် ကျော့မော့နေအောင် ပြင်ဆင်ပြီး ပွဲတက်နိုင်တာလဲ။