Darling! [norenmin]

66 - Happier

"I hope you're happy
but not like how
you were with me"

ဂျဲနိုနဲ့တွေ့ရပြီး မကြာခင် ဟင်ဒရီလည်း ရန်ကျွင်ရှိရာသို့ ရောက်လာခဲ့သည်။ ဟင်ဒရီက တွေ့တွေ့ချင်း မပြီးနိုင်မစီးနိုင် ငေါက်ငမ်းသည်။ ပေါ့တိပေါ့ဆ၊ နမော်နမဲ့၊ ဖြစ်ကတတ်ဆန်း နေချင်ရာနေပြီး အရေးကြုံလျှင် လူတိုင်းကိုဒုက္ခပေးသည် ဟုဆိုသည်။ ထိုဆုံးမစကားများသည် ရန်ကျွင် နားထောင်ရလွန်း၍ အိပ်ငိုက်သည်ထိ မရပ်တန့်ခဲ့။

"သိလား သူကျွန်တော့်ကို ဆန်ကုန်မြေလေးလို့ မပြောရုံတမယ်ပဲ"

ထို့ကြောင့် ရန်ကျွင်သည်ဂျဲနိုကို 'သိလား သိလား'ဖြင့် အစချီ၍ ဘယ်လိုဘယ်ပုံ အငေါက်ခံရသည်ကို တိုင်တန်းတော့သည်။

"သူကမင်းအတွက် အရမ်းစိုးရိမ်နေတာ"

ဂျဲနိုက ရန်ကျွင်ရဲ့ ခေါင်းလုံးလုံးလေးကို ပွတ်သပ်ကာ ချော့မော့လိုက်သည်။ ရန်ကျွင်သည် ဂျဲနိုရဲ့လက်မောင်းရင်းပေါ် ခေါင်းဦးကာ တစ်ကိုယ်လုံး မှီတွယ်ထားသည်။ ခြေတစ်ဖက်က ဂျဲနိုရဲ့ခြေထောက်ကြား ညပ်မိနေပြီး ကျန်တစ်ဖက်ကို ဒူးထောင်ကာ ဘယ်ညာယမ်းနေသည်။

"ဒါလင်ကရော မစိုးရိမ်ဘူးလား ကျွန်တော့်ကို သတိရောရရဲ့လား"

'မင်းငါ့ကို မချစ်တော့ဘူးလား' ဟူသော မေးခွန်းမျိုးသည် ချစ်သူများကြားတွင် ဒုတိယရေပန်းအစားဆုံး မေးခွန်းဖြစ်သည်။

"သတိမရဘူးဆိုရင်ရော"

ဂျဲနိုက မျက်လုံးလှန်၍ ခပ်တည်တည်ဖြေသည်။ ထို့နောက် ရင်ခွင်ထဲတွင် နှာမှုတ်နေသောရန်ကျွင်ကို မသိချင်ယောင် ဆောင်ထားသည်။ ရန်ကျွင်က အပိုစကားမပြော၊ ရုတ်တရက် ခေါင်းလှည့်ကာ ဂျဲနိုရဲ့ရင်ဘတ်ကို ကုန်းကိုက်လိုက်သည်။ ဂျဲနိုက ရှောင်သောအခါ အားမရဟန်ဖြင့် တစ်ကိုယ်လုံးတက်ခွ၍ အနှံ့လိုက်ကိုက်သည်။

အင်္ကျီပေါ်မှ ခပ်ရွရွလေးခြစ်နေသော သွားနှစ်တန်းသည် ဂျဲနိုကို မနေနိုင်အောင် ယားကျိကျိဖြစ်စေသည်။

"ကိုက် ကိုက် ငါတို့ကလေးလေး သွားဖုံးယားနေတာ"

ရန်ကျွင်က သူ့အောက်မှလူကို သွားနဲ့ယားအောင်လုပ်သလို လက်နဲ့လည်း ကလိထိုးသည်။ လုံလောက်ပြီဟူ၍ ရပ်တန့်ပေးသောအခါ သူလုပ်သမျှ ခံနေရတဲ့ဂျဲနိုတွင် တစ်ကိုယ်လုံး ချွေးပျံနေတော့သည်။