Darling! [norenmin]

13 - Haste

Devils on my shoulder
Got an aching down my spine
Feel like chains are getting heavy
But I don't know which are mine

-Two Faced (Jake Daniels)

ဆောက်လုပ်ရေးဆိုက်က ဆိပ်ကမ်းအနီးတွင်ရှိပြီး အသွားအပြန် ကုန်သဘေ်ာနဲ့ စက်လှေများမှ ပစ္စည်းများသိုလှောင်ရန် ကြီးမားသော ကုန်လှောင်ရုံတစ်ခု တည်ဆောက်နေခြင်း ဖြစ်သည်။

အပြင်ဘက်တွင် နေ့အလင်းရောင် ရှိနေသော်လည်း အဆောက်အဦး အတွင်းပိုင်းမှာ ကိုယ့်ခြေထောက်ကိုယ် ပြန်မမြင်နိုင်သည်ထိ ​မှောင်မိုက်နေသည်။ ကုန်လှောင်ရုံမှာ မီတာရှစ်ဆယ် ပတ်လည်ကျယ်၍ နှစ်ထပ်ကားများ လွတ်လွတ်ကင်းကင်း ဝင်ထွက်လို့ရသည်ထိ မြင့်သော ဂိတ်တံခါးနှစ်ခုရှိသည်။ ဂဟေမဆက်ရသေးသော ယက်မများကို မျက်နှာကျက်တွင် ကြုံသလိုပစ်တင်ထားပြီး ကြမ်းပြင်တွင်လည်း အတိုအရှည်အမျိုးမျိုး စတီးချောင်းများ ပြန့်ကျဲနေသည်။ အရွယ်အစား ကြီးမားလှသော အဆောက်အဦးကြီးက သူ့အတွင်းထဲ ဝင်လာသူမှန်သမျှကို သေးငယ်ပုံပေါက်စေသည်။ ခါတိုင်းနေ့များတွင် များစွာသော အလုပ်သမားများ၊ ပညာရှင်များ၊ သယ်ယူပို့ဆောင်သူများနဲ့ ပျားပန်းခတ်နေလေ့ရှိသည်။

သို့သော်ယနေ့တော့ ပုံမှန်နဲ့မတူ အထူးတိတ်ဆိတ်နေသည်။

အမိုးလစ်လပ်နေသော ခေါင်တိုင်မှတစ်ဆင့် နေအလင်းတန်းသည် အမှောင်ထုအတွင်း မှိန်ဖျော့စွာ ဖြာကျနေသည်။ အလင်းရောင်အောက်တွင် တစ်ခုထဲထီးထီး ရပ်တည်နေသော ထိုင်ခုံတစ်လုံးနဲ့ ထိုခုံပေါ်တွင်ထိုင်နေသော လူတစ်ယောက်မှလွဲ၍ အခြားမရှိ။ ထိုလူက လက်ပတ်နာရီကို မီးဖွင့်၍ တစ်ချက်ကြည့်လိုက်သည်။ ထို့နောက် စိတ်မရှည်မှုကို ဖော်ပြနေတဲ့အလား ဒူးပေါ်ချိတ်ထားသော ခြေထောက်တစ်ချောင်းက တဆတ်ဆတ်လှုပ်လာသည်။

စောင့်ဆိုင်းရတဲ့အချိန် ကြာလာတာနဲ့အမျှ စိတ်လှုပ်ရှားမှုက ပိုတိုးလာပြီး နောက်ဆုံးတွင် ထိုက်တန်သောရလဒ်တစ်ခု ထွက်ပေါ်လာလိမ့်မည်။ သားကောင်ရှေ့တွင် အန္တရာယ်နည်းသယောင်၊ ပျော့ညံ့ယောင်ဆောင်ပြီးမှ တစ်ချက်ထဲ အမိဖမ်းရခြင်းက ပိုစိတ်ဝင်စားစရာကောင်းပြီး ပျော်စရာကောင်းသည်။