Darling! [norenmin]

49 - Days before chaos (2)

Walk you down, Im all in
Hold you tight, you call and
I'll take control,
your body and soul

-To the Bone (Pamungkas)

နာဂျဲယ်မင်ကို မျက်စိအောက်မှ ပျောက်သွားသဖြင့် ဟိုဟိုဒီဒီလိုက်ရှာနေသော လီဂျဲနိုသည် အမှောင်ခန်းတွင်းမှ ထွက်လာသော လက်တစ်ဖက်ဖြင့် ဆွဲယူခံလိုက်ရသည်။

အခန်းတွင်းမှလူက သူ့ကိုနံရံတွင်ကပ်ထားပြီး လက်တစ်ဖက်ဖြင့် အင်္ကျီကော်လံကို ဆွဲဆောင့်ကာ ကျန်တစ်ဖက်က ဆံပင်တွေကြားထဲ ထိုးဖွနေသည်။ ဤသို့သော နေရာမျိုးတွင် ပထမဆုံးအကြိမ်အဖြစ် တစ်စုံတစ်ယောက်ထံမှ ဆွဲလားရမ်းလား လုပ်ခံရသောလီဂျဲနိုက တစ်ခဏကြောင်သွားသည်။ သို့သော် ကိစ္စမရှိ၊ ထိုလက်တွင်ပတ်ထားသော နာရီအပြင် ရင်းနှီးနေသော အငွေ့အသက်ကြောင့် သူ့ရှေ့မှလူကို တန်းမှတ်မိနိုင်သည်။ ဂျဲနိုက ပခုံးကိုဖြေလျော့ကာ စိတ်ကြိုက်ဆော့ကစားခွင့် ပေးထားသည်။

"ဒီလိုနေရာမျိုးမှာ လျှောက်မပြေးရဘူး အချစ်လေး မဟုတ်ရင် နှာဘူးကောင်တွေနဲ့ တည့်တည့်တိုးလိမ့်မယ်"

ဂျဲနိုက နာဂျဲယ်မင်ရဲ့လက်ခုံကို အသာအယာထိတွေ့ရင်း ခပ်အေးအေးဆိုသည်။ သူ့ရဲ့လည်ပင်းထက်ရှိ လည်စည်းကြိုးမှာ နာဂျဲယ်မင်ရဲ့ လက်များဖြင့် တင်းကြပ်စွာ ရစ်ပတ်ခံထားရသည်။ ထိုတင်းကြပ်မှုက အသက်ရှုရပ်သည်ထိ မဟုတ်သော်လည်း တစ်မျိုးတစ်ဖုံ စိတ်လှုပ်ရှားမှု ပေးနိုင်သည်။

"အခုလိုမျိုးလား ဒါလင်"

ဂျဲနိုရဲ့နားထဲတွင် မိနစ်ပိုင်းလေးတင် မတွေ့လိုက်ရသော နာဂျဲယ်မင်ရဲ့အသံက လည်ချောင်းတွင် ထိခိုက်ဒဏ်ရာရနေသကဲ့သို့ ကွဲရှရှနိုင်နေသည်။

"အင်း အခုလိုမျိုး ငါဒီမှာ အနိုင်ကျင့်ခံနေရတယ်လေ"

နာဂျဲယ်မင်က ရယ်သည်။ သူရဲ့ခန္ဓာကိုယ်မှ တုန်ခါမှုကို ပခုံးအပ်၊ နဖူးချင်းထိကပ်ထားသော ဂျဲနိုသည်လည်း ခံစားမိနိုင်သည်။

ထို့နောက်သူတို့သည် တစ်ယောက်ရဲ့တည်ရှိမှုကို တစ်ယောက် ငတ်မွတ်နေကြသော လူများကဲ့သို့ ပြင်းပြစွာနမ်းရှိုက်ကြသည်။ ဂျဲနိုက လက်နှစ်ဖက်လုံးကို ခန္ဓာကိုယ်ဘေးတွင် လွတ်လွတ်ရှင်းရှင်း ချထားသည်။ မကြာခင်တွင် နာဂျဲယ်မင်ကိုယ်တိုင်က ထိုလက်များကို ဆွဲယူသွားပြီး ခါးထက်တွင် နေရာချထားပေးသည်။ သူ့ရဲ့ကိုယ်ကို ထိတွေ့ကိုင်တွယ်ရန် ခွင့်ပြုချက်ဖြစ်ပြီး ဂျဲနိုနဲ့ ပိုမိုရင်းနှီးလိုကြောင်း အချက်ပြမှုလည်းဖြစ်သည်။