Darling! [norenmin]

14 - Withdraw

After the ring
He talks to me, as we are friends.
I know something weird's happening
inside his mind, should I ask?

-Melody of a murder (Scarlett Rose)

စက္ကန့်ပိုင်းခန့် တွေဝေသွားပြီးနောက်တွင် ဂျဲယ်မင်ရဲ့ခေါင်းက ကြည်ကြည်လင်လင် ပြန်ဖြစ်သွားသည်။ သို့သော် အချိန်ကြာသည်ထိ သူ့တွင် ဘာမှဖြစ်မလာသောအခါ ခေါင်းမော့ကြည့်လိုက်သည်။

"နှမြောစရာပဲ အလှလေး"

ဂျဲယ်မင်က ခေါင်းနောက်ဆုတ်၍ ​ရှောင်လိုက်သည်။ ခုနက ကြမ်းပေါ်လဲကျစဥ်က အင်္ဂတေမှုန့်များ ပေနေသောလက်ဖြင့် လီဂျဲနိုက သူ့မျက်နှာကိုကိုင်ရန် လက်လှမ်းနေသည်။ စိတ်ပျက်စရာပင်။

"ဒီနေ့က မင်းကံကောင်းပြီးတော့ ကိုယ်ကံဆိုးသွားတဲ့နေ့လား မပြောတတ်ဘူးနော်"

ဘေးပတ်လည်မှ ချုပ်ကိုင်ထားသော လူများက ပြန်ဆုတ်သွားကြသည်။ အကြောင်းအရင်းကို မသိရ။ သို့သော်  ရုတ်တရက်ကြီး သူ့ဘာသာသူ စိတ်ကောင်းဝင်ပြီး နောက်ဆုတ်သွားတာမျိုး မဟုတ်တာ သေချာသည်။

"သွားတော့"

လီဂျဲနိုရဲ့အကြည့်တွင် ဖုံးကွယ်ထားသော ဒေါသနဲ့ မချင့်မရဲဖြစ်နေဟန် အငွေ့အသက်တစ်ချို့ ကိန်းအောင်းနေသည်။ ထို့နောက် မတ်တပ်ရပ်ရတာ ပင်ပန်းဟန်ဖြင့် ကြမ်းခင်းပေါ် ထိုင်လိုက်သည်။

"ကံဆိုတာ အမြဲတမ်းမကောင်းနိုင်ဘူး ဒေါက်တာနာ... ဒီတစ်ကြိမ် လွတ်သွားပြီးရင် နောက်တစ်ကြိမ်အတွက် သေသေချာချာ သတိထားလိမ့်မယ်လို့ မျှော်လင့်ပါတယ်။ အခုတော့လေ ကိုယ်နောင်တရတယ် နောက်တစ်ကြိမ် အချိန်မဆွဲတော့ဘူး"

နာဂျဲယ်မင်အတွက်တော့ 'အင်း ကြိုးစားပါ'ဟူ၍ ပြောပေးရုံကလွဲ အခြားမရှိပေ။ ထို့နောက် လီဂျဲနိုနဲ့ သူ့လူအုပ်စုကို ချန်ထားရစ်ခဲ့ပြီး အပြင်ဘက်သို့ ဦးတည်လိုက်သည်။ သူက ခပ်နှေးနှေးသာ လမ်းလျှောက်နိုင်သောကြောင့် အဆောက်အဦးထဲမှထွက်ရန် ဖြည်းဖြည်းချင်း အချိန်ယူလိုက်ရသည်။

အပြင်ဘက်မှ စိုစွတ်သောလေအေးများရဲ့ ရိုက်ခတ်မှုက မျက်နှာတည့်တည့်ကို ရေနဲ့ပက်ခံရသလိုပင်။ အပြင်မှာ ရောက်နေတဲ့သူက တစ်ခြားလူမဟုတ် ရှီနိုဟာရာမိသားစုရဲ့ ခေါင်းဆောင် မစ္စတာရှီဒိုဖြစ်သည်။ ထို့ကြောင့်သာ လီဂျဲနိုက နောက်ဆုတ်သွားခြင်း ဖြစ်သည်။