Darling! [norenmin]

45 - my nemesis

When I saw you
I fell in love
and you smiled
because you know

-William Shakespeare-

ဤသို့ဖြင့် ခွေးတစ်ကောင်နဲ့ လူတစ်ယောက်က ရန်သူ-ရန်သူ ဆက်ဆံရေးကို စတင်ခဲ့ကြသည်။

ထိုအမွှေးစုတ်ဖွား သတ္တဝါက မြေကြီးနဲ့ထိရတာမကြိုက်။ ကြမ်းပြင်တွင် အခင်းမရှိရင်မအိပ်။ စတော်ဘယ်ရီအရသာ ပိုက်ချိုချဥ်ကို ရှေ့လက်နှစ်ဖက်နဲ့ ထိန်းကိုင်ကာ လျှာနဲ့ယက်တတ်သည်။ အချိန်ရရင်ရသလို နာဂျဲယ်မင်ရဲ့ဘောင်းဘီကို ဆွဲချွတ်ချင်သည်။

ခွေးသက်မပြည့်သေးတဲ့ ခွေးတစ်ကောင်အနေနဲ့ လုပ်နိုင်တာတွေ များလွန်းသည်။

ဂျဲယ်မင်က သူ့ဘောင်းဘီအောက်ခြေကို ကိုက်ဆွဲနေတဲ့ အဖြူရောင်သတ္တဝါကို ဂုတ်ကကိုင်မသည်။ သူတို့မှာ ရောက်ကတည်းက ငြိမ်းချမ်းရေးမရသေး။ နာမည်မရှိသေးတဲ့ ခွေးစုတ်လေးက လက်တိုတိုလေးတွေယမ်းကာ သူ့ကိုတိုက်ခိုက်ရန် ကြိုးစားနေသည်။ အမွှေးဖွဖွအမြှီးက လေထဲတွင် ဘယ်ညာယမ်းနေပြီး ဂူးဂူးဂါးဂါးအသံဖြင့် မာန်ဖီနေခဲ့သည်။ ထိုစဥ် အိမ်ရှေ့ခြံတံခါးမှ လူခေါ်ဘဲလ်သံကြောင့် လူနဲ့ခွေးရဲ့ အကြည့်ပြိုင်ပွဲက တစ်ခန်းရပ်သွားသည်။

ကျောက်လှေကားထိပ်တွင် ရပ်နေသူက လီဂျဲနိုမှလွဲ၍ အခြားမရှိပေ။ အဖြူရောင်အမွှေးများကို လက်ငါးချောင်းနဲ့ ညင်ညင်သာသာပွတ်သပ်နေတဲ့ လီဂျဲနိုကိုကြည့်၍ နာဂျဲယ်မင်မှာ ခပ်ချဥ်ချဥ်ဖြစ်လာသည်။ သူ့ပိုင်ရှင်အစစ်က ဘယ်သူလဲ မေးနေစရာမလို။ လီဂျဲနိုရဲ့ ကားစက်သံ ကြားရုံရှိသေးသည်။ ထိုခွေးစုတ်လေးက အရင်ပြေးထွက်သွားပြီး ခြံတံခါးကိုခေါင်းနဲ့တိုးကာ ဖွင့်ပေးရန် ဆန္ဒပြနေခဲ့သည်။

"တစ်ယောက်ယောက်က ငါ့ရဲ့အဖြူလေးကို အစာကျွေးဖို့မေ့နေမှာစိုးလို့"

ဂျဲနိုက ဒူးတစ်ဖက်ထောက်ထိုင်ကာ ခွေးစာထုပ်ဖြေသည်။ ထို့နောက် သူ့လက်ဖဝါးထဲ နည်းနည်းစီထည့်ကာ တိုက်ရိုက်ကျွေးနေသည်။

"ပိုက်ချိုချဥ်ဝယ်ခဲ့ရမှာ"

ထိုမြင်ကွင်းကိုကြည့်၍ ဂျဲယ်မင်က မကျေမနပ်နဲ့ မျက်မှောင်ကျုံ့လိုက်သည်။ မနက်ကလေးတင် စားသောက်ပြီးသော ထိုအကောင်မှာ ထပ်စားနိုင်သေးသည်။ ပြီးတော့ လီဂျဲနိုကလည်း လက်ကို အထပ်ထပ်ဆေးရန် လိုအပ်လိမ့်မည်။