Darling! [norenmin]

7 - Cutie

But what he doesn't know is
that Im the man of his boy dreams.
Even when he's alone or
Even when I'm gone, he thinks of me.

-Melody of a murder (Scarlett Rose)

မျက်နှာထက်တွင် တင်ကျန်ရစ်နေသော ရေစက်များကို လက်နှစ်ဖက်ဖြင့် သပ်ချလိုက်သည်။ နောက်ဆုံးတော့ စိတ်အခြေအနေ လန်းလန်းဆန်းဆန်း ပြန်ဖြစ်သွားသလို ခံစားလိုက်ရသည်။ သူ့ရဲ့ပခုံးနှစ်ဖက်လုံး တောင့်တင်းနေပြီး ခေါင်းလှည့်၍ ချိုးလိုက်သောအခါ လည်ပင်းဆစ်မှ ဂျိုးဂျိုးဂျွတ်ဂျွတ် အသံထွက်လာသည်။

ဆရာဝန်တစ်ယောက် ဖြစ်လာကာမှ လူသားတွေရဲ့ခန္ဓာကိုယ်က မည်မျှအထိ ကျိုးလွယ်ပဲ့လွယ်ကြောင်း သိရှိလာရသည်။

ယနေ့မနက် ဆေးခန်းတွင် အရေးပေါ်ဒဏ်ရာဖြင့် လူနာတစ်ယောက် ရောက်လာသည်။ လူနာရဲ့လက်ဖျံတွင် အရိုးထိနက်သော အပေါက်ရှိနေပြီး သံဘောလုံးများစွာ တပ်ဆင်ထားသော ဖောက်ခွဲရေးပစ္စည်း ထိမှန်ခဲ့ခြင်းဖြစ်သည်။ ကျေးဇူးတင်စရာ ကောင်းလှစွာဖြင့် ထိုလူကို သူ့မိတ်ဆွေများက နာကျင်မှုသက်သာစေရန် လမ်းတစ်လျှောက် အယ်ကိုဟော အမူးတိုက်ခဲ့ကြသည်။ အကျိုးဆက်အနေနဲ့ ဆေးခန်းသို့ ရောက်သောအခါ မည်သည့်ထုံဆေးမှ မတိုးတော့ပေ။

ထို့ကြောင့် ဒဏ်ရာရှိသော နေရာတစ်ဝိုက်ကို ရှင်းလင်းခြင်း၊ ကြေမွသွားသော အရိုးနဲ့အသားစများကို ဖယ်ထုတ်ခြင်း၊ လစ်ဟသွားသော လက်ဖျံရိုးနေရာကို စတီးပြားအုပ်၍ ထောင့်လေးထောင့်တွင် မူလီဖြင့်ကြပ်ခြင်း၊ ထို့နောက် ဒဏ်ရာကိုချုပ်ခြင်း အစရှိသော လုပ်ငန်းစဥ်များကို မေ့ဆေး(သို့)ထုံဆေး အကူအညီမပါဘဲ လုပ်ခဲ့ရသည်။ ထိုဖြစ်စဥ်က လူနာကိုရော အာရုံစိုက်နေရသော ဒေါက်တာကိုရော ကောင်းစွာ ဒုက္ခများစေသည်။

အားလုံး ပြီးဆုံးသွားသောအခါ ဒေါက်တာနာရဲ့ မျက်နှာကာအဖြူတွင် ချွေးများ စိုနစ်ကျန်ခဲ့သည်။ ထိုလူမှာလည်း ဆေးခန်းတံခါးဝ ရောက်သည်ထိ သူ့အလုပ်ရှင်ကို ဘာသာစကားပေါင်းစုံဖြင့် ကျိန်ဆဲသွားသည်။ သို့သော် တတ်နိုင်တာ များများစားစားမရှိ။ နောက်သုံးလအကြာ စတီးပြား ပြန်ထုတ်ချိန်တွင် ယခုကဲ့သို့မူးမနေရန် မျှော်လင့်ရသည်။