Darling! [norenmin]

2 - Yellow

Baby will I ever see you,
sakura will I breathe again?

-Sakura will I breathe again

"ငါ့နှလုံးက ပါးစပ်ကနေ ထွက်ကျတော့မလိုပဲ"

အန်းယူရီက သူမရဲ့ရင်ဘတ်ကို လက်နဲ့ဖိလျက် ရင်တုန်ပန်းတုန်ဖြစ်စွာ ဆိုလေသည်။ သူမရဲ့ဘေးတွင် မစ္စရှီဒိုလည်း ရှိနေပြီး ထိုနှစ်ယောက်က ဂျဲယ်မင်ကို မျက်နှာချင်းဆိုင်လျက် ဖြေရှင်းချက်တောင်းသလို ကြည့်နေကြသည်။

ဒုတိယထပ်တွင် ရှိနေရမဲ့ သူတို့ရဲ့ဓားစာခံက အဘယ်ကြောင့် ဆေးခန်းတံခါးဝတွင် အိပ်ပျော်နေရသလဲ သူတို့မသိ။ အေးစက်နေသော ကော်ရစ်တာတွင် ဘယ်လောက်ကြာကြာ ထိုင်နေခဲ့မှန်း သူတို့မသိ။ တစ်ယောက်ယောက်က အိပ်ချင်မူးတူးဖြင့် စောင့်ကြည့်ရေး ကင်မရာများကို စစ်ဆေးသောအခါမှ တွေ့ရှိခဲ့ခြင်းဖြစ်သည်။

"သူက စိတ်အနှောင့်ယှက် ပေးတယ် အဲ့တာကြောင့် အပြင်ထုတ်ထားတာ"

ဒေါက်တာနာက သူ့ကိုကြည့်နေသော မျက်လုံးနှစ်စုံကို ​ရှောင်ကွင်းလျက် အမှုမထားဟန် ပြန်ဖြေလိုက်သည်။ သူ့ကိုယ်ပိုင် အခန်းတွင်းမှ သူမကြိုက်သောသူကို ကန်ထုတ်ပိုင်ခွင့် ရှိသည်။ ထိုလူက အပေါ်ထပ်ကို တက်သွားရမဲ့အစား ကိုယ့်သဘောနဲ့ကိုယ် တံခါးအပြင်မှာ ထိုင်စောင့်နေခြင်းက သူနဲ့မသက်ဆိုင်ပေ။

ရလဒ်အနေနဲ့ တစ်စုံတစ်ယောက်သော သူမှာ ကိုယ်အပူရှိန်တက်၍ သံကုတင်ပေါ်တွင် ထပ်မံလဲလျောင်း နေရသည်။ သူ့မှာအစကတည်းက အင်္ကျီဝတ်မထား၊ သေတူရှင်မကွာအဖြစ် ဆွဲလာခဲ့သော စောင်တစ်ထည်သာ ရှိသည်။ ထို့ကြောင့် အေးစိမ့်နေသော ​မြေအောက်ထပ်တွင် ရေခဲရိုက်ခံရခြင်း အတွေ့အကြုံကို ရသွားခဲ့သည်။

သို့သော် ထိုကိစ္စနဲ့ပတ်သက်၍ ဒေါက်တာနာတွင် အပြစ်ရှိစိတ် နည်းနည်းလေးမှ မရှိပေ။

"နာဂျဲယ်မင် လူတိုင်းအပေါ်ကို အဲ့လိုလုပ်နေရင် တစ်နေ့နေ့ ချောင်းရိုက်ခံရလိမ့်မယ်"

အန်းယူရီက သက်ပြင်းချလိုက်သည်။ သူမနဲ့ ထိုလူငယ်လေးရဲ့ အမေက ညီအစ်မအရင်းများ ဖြစ်ကြသည်။ ထို့ကြောင့် သွေးနီးသည်ဟု ပြော၍ရသည်။ သို့သော် အချိန်အကြာကြီးနေမှ ပြန်တွေ့ရသော တူဖြစ်သူကို သူမတကယ်ကို မကိုင်တွယ်တတ်ပေ။ ထိုကလေးက ခေါင်းမာသည့်အပြင် ပြန်မ​ပြောနားမထောင် ပြောရဆိုရခက်ပြီး နားလည်ရခက်သည်။