Darling! [norenmin]

16 - Promise

Boy becomes a man now
can't tell a man to slowdown.
He'll just do whatever
do whatever he wants.

-Seventeen (Troye Sivan)

မနက်ရှစ်နာရီ။

ဂျဲနိုက အိပ်ယာဘေးရှိ စားပွဲကုလားထိုင်တွင် ထိုင်နေလျက် ဗီဒီယိုကောမှတစ်ဆင့် တစ်စုံတစ်ခုကို ဆွေးနွေးနေပုံရသည်။ တစ်ဖက်တွင် အခုလက်ရှိ ပေကျင်းရောက်နေသော ဟင်ဒရီရှိနေသည်။ ရန်ကျွင်က အခန်းတွင်းသို့ ခြေဖျားထောက်၍ ဝင်လိုက်သည်။ ထို့နောက် သစ်သီးစိမ်ထားသော ရေခဲရေခွက်ကို စားပွဲပေါ်ချပြီးနောက် ဘေးတွင်ခုံတစ်ခုံယူ၍ ဝင်ထိုင်လိုက်သည်။ သူရောက်ကတည်းက နှစ်ဖက်စလုံးရဲ့ စကားအသွားအလာများ ကန့်သတ်လိုက်ကြောင်း သတိထားမိသည်။ ကြည့်ရတာသူက အနှောင့်အယှက် ဖြစ်နေပုံရသည်။ သို့သော်တစ်ခါတစ်ရံ လူတွေကို အနှောင့်အယှက်ပေးရတာ စိတ်ဝင်စားစရာကောင်းသည်။

ရန်ကျွင်က စားပွဲပေါ်မေးထောက်၍ ဂျဲနိုရဲ့ ဘေးတိုက်ပုံရိပ်ကို ငေးကြည့်လိုက်သည်။ ဒါလင်က မျက်မှန်တပ်ထားသည်။ မျက်လုံးများက တစ်ချက်တစ်ချက် သူရှိတဲ့ဘက်ကို အာရုံရောက်လာတတ်ပြီး ဘာကြောင့်မှန်းမသိ ပြုံးပြတတ်သည်။ သူတို့က တူညီတဲ့ဘာသာစကားကို ပြောနေကြပေမဲ့ အကြောင်းအရာတွေကို ရန်ကျွင်နားမလည်နိုင်ပေ။ အချို့နေရာများတွင် တမင်တကာပင် ဟင်ဒရီနဲ့သာ အချင်းချင်းနားလည်နိုင်သော ဆက်သွယ်မှုမျိုးကို သုံးနေကြသည်။

ထိုသို့သောအချိန်မျိုးတွင် သူနဲ့ဒါလင်က အဝေးကြီး ဝေးကွာနေတယ်လို့ ခံစားရသည်။ နှစ်ယောက်ကြား အမှန်တကယ် အကွာအဝေးက တစ်မီတာပင်မခြားသော်လည်း လက်လှမ်းမမှီသည်ထိ မပြောနိုင်၊ မကြားနိုင်၊ နားမလည်နိုင်သည်ထိ ဝေးကွာနေသည်။ ထိုခြားနားမှုက မတူညီသော ကမ္ဘာနှစ်ခုတွင် နေထိုင်နေကြသော လူနှစ်ယောက်ကဲ့သို့ ဖြစ်သည်။

စဥ်းစားကြည့်ပါက ဘယ်တုန်းကမှ မနီးစပ်ခဲ့ဖူးဟုပင် ပြောလို့ရသည်။

အော်...။

ရန်ကျွင် နောက်တစ်ကြိမ် သတိကပ်သွားသည်။ သူကမဆုံးနိုင်တဲ့ အတွေးများစွာကို နက်နက်နဲနဲ တွေးတောနေခိုက်တွင် ဘေးပတ်လည်က တိတ်ဆိတ်သွားကြောင်း သတိထားမိလိုက်သည်။ ဗီဒီယိုကောလည်း ပိတ်ပြီးသွားပြီ။ ဒါလင်ကလည်း မျက်မှန်ချွတ်လိုက်ပြီ။ ပြီးတော့ ဘာစကားမှမပြောဘဲ သူကြည့်နေသလိုမျိုး သူ့ကိုပြန်၍ စိုက်ကြည့်နေသည်။ လူနှစ်ယောက်တွင် တစ်ယောက်ကခေါင်းမော့လျက် ကျန်တစ်ယောက်က ခေါင်းငုံ့နေပြီး အပြန်အလှန် ကြည့်နေကြသည်။