Darling! [norenmin]

17 - Confession

Cause the dream!
That you and I have made is,
still so clear on me.

-Sakura will I breathe again

လေဆိပ်အပြင်ရောက်ရောက်ချင်း ရန်ကျွင်က ကျောလွယ်အိတ်ကို ဂျဲနိုလက်ထဲ ထည့်လိုက်သည်။ ထို့နောက် လျှာထိုးဦးထုပ်ကို ခပ်ငိုက်ငိုက်စောင်းကာ ဖိနပ်ကြိုးသေချာ ချည်လိုက်သည်။ ဖုန်းထဲမှ တည်နေရာပြမြေပုံကို ဖွင့်ကြည့်ရင်း...

"ဒါလင်က သူတို့နဲ့လိုက်သွား ကျွန်တော်က ကိုယ့်ဘာသာသွားမယ်"

အပြင်ဘက်တွင် ဂျဲနိုကိုလာကြိုသော ကားတစ်စီးသက်သက် ရှိနေပြီးဖြစ်သည်။ သို့သော်ရန်ကျွင်တွင် ကိုယ်ပိုင်အစီအစဥ်များ ရှိနေဟန်ရသည်။

"တစ်ယောက်ထဲလား"

"အင်း ညနေကျပြန်ခဲ့မယ် ဟိုတယ်လိပ်စာပို့လိုက်"

ရန်ကျွင်က သူ့ရဲ့မာဖလာနဲ့ အပေါ်ဝတ်အင်္ကျီတွေကို ဂျဲနိုရဲ့ကိုယ်ပေါ် ပစ်တင်ထားခဲ့ပြီးနောက် အလောသုံးဆယ်ဖြင့် ထွက်သွားသည်။ တစ်ပတ်တိတိ အင်တိုက်အားတိုက် တောင်းဆိုမှုအပြီးတွင် ဂျဲနိနဲ့အတူတူ တိုကျိုသို့ လိုက်ခွင့်ရသွားခဲ့သည်။ ဤသို့ဖြင့် လေဆိပ်ရှေ့တွင် ဂျဲနိုတစ်ယောက်ထဲ ကျန်ခဲ့တော့သည်။

ဖုန်းရဲ့မြေပုံက အမြဲတမ်းမှန်ကန်မနေ။ တစ်ခါတစ်ရံတွင် မင်းက ကော်ဖီဆိုင်တစ်ဆိုင် ရှာဖွေနေစဥ်တွင် မြေပုံကမင်းကို ပစိဖိတ်သမုဒ္ဒရာထဲ ခေါ်ဆောင်သွားလိမ့်မည်။ သူလိုချင်သော နေရာသို့ရောက်ရန် ရန်ကျွင်အတော်လေး အားစိုက်ထုတ်လိုက်ရသည်။

လမ်းကျဥ်းလေးထဲတွင် ဖုန်းတစ်လုံးဖြင့် တောင်ကြည့်မြောက်ကြည့် လုပ်နေသော လူတစ်ယောက်ရှိနေပြီး သူနဲ့ဆန့်ကျင်ဘက်တွင် ထီးတစ်လက်ဖြင့် လမ်းလျှောက်လာသော အခြားတစ်ယောက် ရှိနေသည်။ ထို့နောက် ရှေ့တွင်ပိတ်ရပ်လာသော တစ်စုံတစ်ယောက်ကြောင့် ထီးဆောင်းထားသောလူရဲ့ ခြေလှမ်းများ ရပ်တန့်သွားရသည်။ ရန်ကျွင်က ထီးရွက်ကိုပင့်မ၍ အောက်ထဲသို့ ခေါင်းငုံ့ဝင်လိုက်သည်။

"Suprise!"

ဂျဲယ်မင် ရုတ်တရက်ဆိုသလို မှင်သက်သွားသည်။ လမ်းကြားထဲ လမ်းလျှောက်နေရင်းနဲ့လည်း အသိတစ်ယောက်ယောက်နဲ့ တွေ့နိုင်တာပဲလား။ အထူးသဖြင့် လွန်ခဲ့တဲ့တစ်လအကြာက ဘယ်တော့မှ ထပ်မတွေ့ရတော့မဲ့ သူလိုမျိုး ပျောက်ကွယ်သွားတဲ့လူကို ပြန်တွေ့ရခြင်းမှာ။ အမှန်တကယ်ကို supriseဖြစ်သည်။