Darling! [norenmin]

18 - Capture

When I hold you in my arms
you suffocate and turn white.
When I look for love
it leaves me and goes far away.

-Nightmare (Love in Saddness)

"ဒေါက်တာနာ ငါမင်းကိုသဘောကျတယ် အရမ်းအရမ်း အရမ်းကို..."

"မင်းကငါ့ကိုလိုချင်တာလား ဒါမှမဟုတ် လီဂျဲနိုကို စိတ်ကုန်သွားရုံလား"

ကောင်းကင်ထက်တွင် မည်သည့်ကြယ်မှမရှိသလို ဆုတောင်းတွေဟာလည်း ဘယ်နေရာကိုမှ ရောက်မသွားခဲ့။

"ဒုတိယတစ်ခုဆိုရင် မင်းကိုအချိန်မရွေး ကူညီပေးလို့ရတယ် ဒါပေမဲ့ ပထမတစ်ခုဆိုရင်တော့ ရန်ကျွင် တောင်းပန်ပါတယ် မင်းနဲ့မတွေ့ခင်ကတည်းက ငါ့မှာချစ်ရတဲ့သူ ရှိထားပြီးပြီ"

ကတိတွေဟာ ဆောင်းမနက်ခင်းရဲ့ ဆီးနှင်းများကဲ့သို့ အရည်ပျော်သွားခဲ့သည်။ အိမ်မက်ကလည်း အိမ်မက်သာဖြစ်ပြီး နိုးထလာသောအခါ လေထဲတွင် ပျောက်ကွယ်သွားလိမ့်မည်။

"အရင်တုန်းက မင်းကိုမယုံဘူးလို့ ငါပြောခဲ့တယ်။ အခုပြန်ပြင်တယ် မင်းကိုယုံပါတယ်ရန်ကျွင် မင်းရဲ့စကားတွေကို ယုံတယ်။ ​ဒါပေမဲ့ မင်းလိုချင်တာကို မလုပ်ပေးနိုင်ဘူး ခံစားချက်ကိုလည်း မတုံ့ပြန်နိုင်တော့ဘူး။ တခြားကြောင့်ဆိုတာထက် ငါသူ့ကို တစ်ရက်မှမေ့မရခဲ့ဘူး မေ့ဖို့ကြိုးစားမှာလည်း မဟုတ်ဘူး"

ထို့နောက် ရန်ကျွင်ရဲ့အသိစိတ်ဟာ လက်တွေ့အမှန်တရားကို ငြင်းဆန်လိုတော့သည်။

ဂျဲနိုက ထိုအကြောင်းများကို ဆက်မတွေးချင်ဟန်ဖြင့် ခေါင်းယမ်းလိုက်သည်။ သူ့ကိုယ်ပေါ်တွင် ညဝတ်အင်္ကျီက လျော့ရဲရဲဖြင့် တွဲကျနေပြီး လူကိုယ်တိုင်ကတော့ မျက်မှန်တစ်လက်တပ်ကာ မပြီးပြတ်သေးသော အလုပ်ကိစ္စများကို လက်စသတ်နေရသည်။ လည်ဟိုက်နေသော ဝတ်စုံအောက်တွင် လည်ပင်းဘေးမှ စာနှစ်ကြောင်းတက်တူးက ထင်းထွက်နေခဲ့သည်။ ထိုတက်တူးမှာ နာဂျဲယ်မင်တစ်ယောက် အတော်လေး သိချင်စိတ်ဖြစ်မိပေမဲ့ အကြောင်းအမျိုးမျိုးကြောင့် အနီးကပ်ကြည့်ခွင့် မရခဲ့သော စာကြောင်းများဖြစ်သည်။

'do not go gentle
into that goodnight'

အမှောင်ချထားသော စာကြည့်ခန်းထဲတွင် ကွန်ပြူတာစခရင်မှ အလင်းရောင်သည် ဂျဲနိုရဲ့မျက်နှာတွင် ထင်ဟပ်နေသည်။ တစ်ဖက်ခန်းမှ ရန်ကျွင်ကတော့ အစောကြီးကတည်းက အိပ်ပျော်သွားပြီး ဖြစ်နိုင်သည်။