Darling! [norenmin]

51 - the chaos has started

Murphy's Law stated that
"what one wished wouldn't happen
would always happen"

မျက်စိရှေ့ရှိ ဗလာသက်သက်လေထုကို စိုက်ကြည့်နေသော လီဂျဲနိုသည် လက်သူကြွယ်ပေါ်မှ လက်စွပ်ကို ပွတ်သပ်သည်။ သူက အတွေးလွန်နေသည် သို့သော် အဖြေမရှိ။ နှစ်ယောက်စလုံးနဲ့ သက်ဆိုင်သော ကိစ္စဖြစ်သဖြင့် နာဂျဲယ်မင်ရဲ့မိသားစု နှစ်ပတ်လည်ရက်ကို အကြောင်းပြကာ အချိန်ဆွဲထားမိသည်။ သို့သော် ထိုနေ့ပြီးနောက် ကုန်ဆုံးသွားသည့် တစ်ရက်ချင်းစီနောက်တွင် သူ့အတွက် ဖိအားများလာသည်။

ယခုအတိုင်းထားပါက နာဂျဲယ်မင်အတွက် မတရားသလို ဖွင့်ပြောပြပါက ရန်ကျွင်ကို ထိခိုက်ခံစားရအောင် လုပ်မိလေမလား တွေဝေနေခဲ့သည်။ နာဂျဲယ်မင်ဆိုတဲ့ လူသားက ဘယ်ကရမှန်းမသိသော ကိုယ့်ကိုယ်ကို  ယုံကြည်မှုများနဲ့ အကြောက်အလန့် ကင်းမဲ့နေခဲ့သည်။ ထို့အပြင် ရန်ကျွင်တစ်ယောက် သူ့ဘာသာ ရှာတွေ့သွားနိုင်တဲ့ ဖြစ်နိုင်ချေလည်း ရှိသေးသည်။

ဂျဲနိုက ​လှေကားမှဆင်းလာစဥ် အပြင်မှ ပြန်လာပုံပေါ်သော ရန်ကျွင်ကို တွေ့လိုက်ရသည်။

"ဘေဘီ ဒီကိုလာဦး စကားပြောဖို့လိုတယ်"

စကားပြောမယ်ဆိုပေမဲ့ အမှန်တကယ်တမ်း ဘယ်ကစပြောရမှန်း သူမစဥ်းစားတတ်။ ရန်ကျွင်က မျက်နှာချင်းဆိုင်တွင် ထိုင်၍ ငြိမ်သက်စွာ စောင့်ဆိုင်းနေသည်။

"အရင်ဆုံး နားလည်စေချင်တာက ကိုယ်မင်းကို အရမ်းချစ်တယ်ဆိုတာ သိတယ်မလား။ ကိုယ့်ဘဝမှာ မင်းနဲ့မတွေ့ခင်အထိ ကြောက်တယ်ဆိုတဲ့ ခံစားချက် မရှိခဲ့ဖူးဘူး။ ဒါပေမဲ့အခု မင်းနာကျင်ခံစားရမှာ ကြောက်တယ်၊ မင်းရဲ့လိုအပ်ချက်တွေကို မဖြည့်ဆည်းပေးနိုင်မှာ ကြောက်တယ်၊ မင်းနဲ့အတူမရှိနိုင်မှာ ကြောက်တယ်။ ရန်ကျွင် ကိုယ်ပြောချင်တာကို နားလည်ရဲ့လား"

ရန်ကျွင်က ထိုင်ခုံပေါ်မှီလျက် ဂျဲနိုရဲ့မျက်နှာကို ငေးငေးမောမော ကြည့်သည်။ ထိုများပြားလှသော အချစ်များကြောင့် လီဂျဲနိုဆိုတဲ့လူအပေါ် ပြန်မဆပ်နိုင်သော အကြွေးတင်နေသကဲ့သို့ ခံစားရစေသည်။