حلقة 6
غمزهااا و دار ماشي و راسو لفوق .... خلاها ممحوصة ... حالفة تشيبو مش هو لي يجي يعايرها خالعينو دراهمو ...
دارت لباباها تشوف في عينيه مدمعين .... راحت تجري عنقاتو : دموعك غاليين ياسر متبكيش يا باا انت عيشتني عزيزة و طول باش نبقى عمري عزيزة عمرك مابخلتني عندك تخمم بهذيك الطريقة كلامو مايهمنيش
باسلها راسها و عنقها كتر .... تفهمو على الرمش و حتى بلا مايحكي حاجة .... دخلاتو للدار قاتلو ريح و انا لي باش نسڨد الحالة .... مراحتش تقرا عشية و قعدت تحرث و تقلب فالارض .... و راسها يخدم و يخمم في نوعية هاد العباد لي ما يهمهم غير نفسهم و الباقي كامل للهاوية .....
بعد المحاورة هاديك معاها حسها ماهيش ساهلة .... بصح مش هو لي تحب تجرب حظها معاه ... قادر بكلمة وحدة يدفنها في سابع ارض .... بصح لالا .... حبت تواجهو ... خلينا نشوفو المواجهة وين باش توصلها .... دخل للدار و عينيه مقلوبين و يافاف من الحياة لي عايشها ....
حبسو صوت باباه و هو طالع فالدروج
عابد و هو متربع على فوتاي الصالون و الڨارو في يدو و عينيه مركزين مع حركات وليدو بالتدقيق: واش درت فالصفقة اللخرانية لي وصيتك عليها!؟؟ و جبد جبدة من السيڨارو ... دارلو و يديه في جيابو و عينيه حادين كانو يقول تستهزى بيا ماني قدها و قدود : و هادي عندك فيه شك يا بابا العزيز (اخر كلمة قالها بحقد و كراهية من القلب)
خزرلو باباه (عابد) و هو فاهم هاد النبرة ملييح واش حاب يوصل بيها ...
عاود استوى قعدتو و وجهلو الكلام بصوت آمر : نسحق الطالع و النازل تاع الشركة كل سمانة
خزرلو من فوق للتحت .... و كمل طالع بيتو ... مش راح يتبدل طماع دراهم و شهرة ....
حقدو اتجاهو كل يوم يكبر .... مايعتبروش اب اصلا ... بالنسبة ليه مركز مالي و بس .... من صغرتو ماعطاه حتى حنان و لا اهتمام .... يامر يوكل يشرب و خلاص .... حتى الغني و عندو احتياجات .... بالاك يكون مالك الدنيا بصح مش مالك ناسها .... ناقص حنان .... ناقص طعم الطفولة .... و الاهم محروم من لذة العايلة .... مع انو عايش مع شبه وحدة .... ام مصلحجية و اب اناني .... و نتيجتها ولد مدلل و مغرور يفعس على الناس و مايحوس على حد ... للاسف الشديد هاد هو حاللل مجتمعنا درك .... والدين مستهتيرين و فالاخير يجيك ولد عاق ... دخل بيتو لي قد القصر بصح مافيهاش اي روح .... خالية من الشعور ... كيما العادة دوش و رمى جسدو على الفراش و رقد
