حلقة 125
بدا يتململ صباح على حاجة تقيلة مكبلاتو ... سياا يجور للجيهة التانية بصح لقى روحو محاصر و ماقدرش يتحرك ... حل عينيه بالشوية ... و لقاها مكبلاتو رجليها لاسقين رجلييه و راسها مغطس،في صدرو ... يديهاا ملفوفين على كرشو ... و نفسهاا منتظم سخون يحرق في رقبتو ... تبسم تبسيمة فرحة من القلب ... حط يديه على شعرها و بدا يمسد فيه غير بلعقل و قلبو باش،يخرج من بلاصتو بالفرحة ... واش تمناها ... واش حلم بيها ... واش خاف متقبلش ... واش خاف والديه مايقبلوش ... بصح فالاخر هادا كامل بح ... و نوال رجعت مرتو و ملكو ... حاجة تابعة ليه و مكتوبة بإسمو ... حس بيها بدات تتململ ...غمض عينيه و دار روحو راقد ... بدات تتكسل و تدير فالحس تاع وحدة نايضة من النوم : امممم ... الشي لي خلا علوش يشعل و سخانتو تطلع على الصباح ... و بقى متحمل باش يشوفها واش راح دير ... حلت عينيها بلعقل كي القطة ... و طلعت راسها ... قابلها وجهو هادي و عينيه مغمضين باين عليه التعب ... شعرو مخرب و خصلات طايحين على جبينو ... عينيها ذبالو من زينو ... قربت يدها لوجهو و بدات تمسح على خدو بحنانة كبيرة : ياعمري واش يهبل دوك هادا راجلي تاعي وحدي ... و تنهدت و كملت تحكي و عينيها يلمعوااا بالعشق: اههه واش تمنيتك و اههه واش تمنيت هاد اللحظة ... بصح عمري تخيلت باش تمون انت زادة رايدني ... حطيت في بالي انك شايفني على اساس صديقة و بس ... و زيادة انا مطلقة و حتى قرايتي ماشي مكملتها الله يهدي لي كان السبب ... مزال موش مامنة انك راقد جنبي ... انو البارح نمت على صدرك و في حضنك الدافي ... حاسة روحي في حلم و لازم واحد يقرصني ... و ماحست غير يد زلقت لخصرهاا و قرصتهااا حتى شهقتت من الخلعة و الالم : هااااا اااككك نناييضض
و ماحستو غير قلبهاا و جابهاا تحتو و يديه محاصرينهاا و وجهو مقابل وجهاا ... قربلها كتر و عينيه تلمع شهوة حب عشق : اكيد نايض يا عمري نايض من اول كلام لاخرو ... و تنهد و حط جبينو على جبينها و كمل يحكي بصوت واطي كانو يهمس: موش عارفة روحك واش عملتي فيا على هادي كنتي تحكي هكااا ... نتي داويتيني بعدما مامرضت ... نتي عقمتيلي الجرح بعدما تحل ... نتي كنتي الهوا لي رجعلي الحياة ... انا حبيتك لنفسك و عشقت تفاصيلك ... و الحب عمرو لا كان ماديات و مستويات بالعكس يا روحي ... الحب ارقى و انقى ببزاف من هاد الشي ...
