حلقة 22
وجدت روحها ... عملت آخر روتوش .... و سترت روحها بعباية كحلة طويلة للتحت ....دخلت لبيت لعروسة لقاتها تبكي
قعدت قدامها و تمسحلها في دموعها : اششش علاش البكا ياك هذا فرحك
نبيلة و هي تبكي بالشهقة : كيفاش فرحي اهه سبأ نتي عارفة بلي حلمنا واحد تمنيت يخلوني نكمل نقرااا حراام عليهم
عنقتهااا تواسي فيها و تتحصر على زهرهم لحرف .... على التقاليد لي تجبرهم يديروا حوايج بالغصب ....
طلعت راسها تشوف فيها .... شدتلها يدها : توعديني انك متكونيش كيفي ضعيفة ... حاربيهم باش تقراي .... و مدام المشروع بدااا عندك فرصة كبييرة اوعديني ... اذا انا استسلمت انتي لالا
تبسمتلها وسط دموعها : نوعدك ياا نبولتي
على آخر كلمة طرطقو لاثنين بالضحك .... كترت الهم يضحك 😢😢
رمات عليها ملحفة البرنوس غطاتلها وجها و خرجتها .... البارود يضرب و الزغاريت تعالت .... الاب واقف عند العتبة ... و البنت خارجة تحت جناحو ... تبكي بالصوت كانو باش تموت ... صوت نحيبها يقطع القلب ... كلهم فاهمين و ساكتين ....
الا هو واقف في وسط الرجال بعدما تلقى دعوة .... بما انو ساهم في تحسين دشرتهم قالو لازم نكبرو بيه و نعرضوه .... يشوف فالعروسة تبكي
كانو باش يقطعولها راسها مش باش تتزوج .... هو ناسي انو البدو و المدينة مش حاجة وحدة ... البدو يحكم بالعقائد و العادات .... و المدينة تحكم بالراي و المشورى ...
طاحت عينو عليها ... بقى يتبع في حركاتها و وجها البريئ .... شفارها مبلولين و مندين .... عينيها حمر و يقطرو دموع .... حب يفهم على واش تبكي .... تحت اسم فضول و بس .... وينو طفل البارح ... زعما صح وليدها .... مزال التساؤلات دور في راسو
نفخ بتوتر .... و بقى محاوطها غير بعينيه ....
ركبوها العود و راجلها يتمشى بيها .... حنة مالية اليدين ...و الالام مالية القلب ... بسمة على وجهو ... و دموع على شفارها ... فرحان بليلتو ... و حزنانة بضياعها .... اجساد باش يجتمعوا باسم زواج ... بصح القلوب مفرقة .... هو طامع للاحسن ... و هي مكتئبة للاسوء
دارها الجديدة مش بعيدة بحكم خاذية ولد عمهاا .... هبطها و حط يدو على كتفها محاوطها .... دخلها عتبة دارها باليمين .... و هي ترعش و تبكي ... وصلوهم لغرفة نومهم ... تغلق عليهم باب واحد ... الناس روحت و الدار فرغت ... قلبها يتحسر على صحبتها ... تمنات و تمنات فالاخير مالقات .... عندها حاجة باقية و هو وعدها
