حلقة 86
و حبست شوية و كملت : يعني بزااف .. طيش الڨارو و جاها و وقف قدامها بالضبط : نتي مرتي و اقل شي نديرو اني نسمي حلم حياتك على اسمك ... نتفكر اول نهار لهاد المشروع ... كيفاش فرحانة و تخدمي معاهم (تشفاو نهار كانت شادة الخريطة 😂😂😂) و ضحك و طلع صبعو يمثللها : دايرة قد هاك بصح محاينك كبار
سبأ ضحكت من عبارتو : ههههه
عاود شدلها و بدا يمشي فيها : وقت طيرتنا هيا ... وقت لي شدها من يدها حست روحها شادة باباها يدو اكبر من يدها بشحال ... طاحت دمعتها كي تفكرت بلي خلاص ماكاش باباها من اليوم و مكاش خدوج على الصباح ... مكاش سماطة نوال ... صعيبة بزااف يتبدل عليك كلش مرة وحدة ... مسحتها بلخف و هي تتفكر في كلامو و توصياتو هو و خدوج و بقات تقوي روحها بيهم ... وصلو للطونوبيل خلاها ركبت و دار ركب و دعس على البنزين و قلع ...
قاعدين كلهم في دار وحدة و ساكتين ... الدار راحلها صوتها بروحة صغرونة الدار ... كلهم يخمموا في شي واحد بصح حد ماهو حاب يفكر لوخر ... سماطت الدار و الفراق صعيب و الولف اصعب ببزاف ... حتى من علوش بقى معاهم يونسهم هاد اليومين ... و منها يونس روحو بنوال 😂😂(يلعب على الحبلين علوش شطور 😂😂) لحقوا للطيارة خلاها هي الاول بصح قبل ماتطلع ... راح للبادي ڨارد حتى من الطيار : هبطو رايسانكم ... هبطو كامل ريسانهم ... راح ليها جبدها من يدها و طلعها بعدما لفها كامل بالبرنوس (حاجة ماتبان 😂😂😂 غيور ) ... و طلع موراها و امرهم يشوفو شغلهم بصح حد مايقرب لحجرتهم ... دخلت و بقاا تسنى فيه ...
و هي تسنى نقزها صوتو الخشين : تقدري تنحي البرنوس ...
ارتاحت بصح حشمت تبقى بهاد الروبة قدامو ... باسكو جاية سور طلي مشلوقة شوية فالرجلين و فيها شقة صغيرة عند الصدر (خدايم خدوج 😂😂😂 تحية كبيرة ليها ) ... هو فهمها قالها هاي بيت لداخل ريحي فيها ... دخلت و نحات البرنوس و راحت تجري للمراية لقات وجها كامل تخسر بالمكياج ... راحت لساكها الصغير جبدت لانجات لي تنحي المكياج و بدات تنحي و تسڨم و منبعد غسلت وجها و عاودت مكياج خفيف غير غيسيل و كحل و الروج مابدلاتوش باش تبان عروسة ... و تكات على السرير لي تم و راحت في نوم عميق من العيا و التعب تاع نهار كامل ...
نحا لافاست تاعو و طيش الكارافات باسكو خنقاتو ... حل القفالي اللولين و رمى روحو على الفوتاي و غمض عينيه ... و راسو يخمم فالحالة الجديدة و معيشتو الجديدة
