حلقة 23
ماشية لدارهم بعدما سبقوها والديها و هي بقات تودع في صحبتها .... حست وطأ اقدام وراها دارت على غفلة .... لقاتو جارهم ....
قربلها و هو يتفحص فيها : مبقاش و تعيشي نفس فرحة صحبتك
طلعت حاجبها و بدات تشر بيدها عليه : ارض ربي واسعة بوسع خاطري معاك .... اعرف حدودك و معادش تڨرب ليا ... و تبقى آخر واحد مانكونش لييك و دارت ماشية حتى حست بيه قبضها من ذراعها و صوتو محشرج غضب : شمعناها يا لالة انا سيدهم و تاع وجهك ... و اذا باش تبقاي تتكبري ياسر باش نرزيك في حياتك و نرجعهالك دمار فهمتي ... و هي تحاول تتفك منو بصح هو بقوتو كذكر متقدرلوش
حتى سمع صوت خشين و رجولي : و ادا ماطلقتهاش دوك انا لي باش نرزيك في حياتك يا ز***
دار باش يوري رجولتو و يستعرض عضلاتو لقى انو مكاش مجال ... طلقها و راح يجري هارب
بدات تمسد في يدها لي خلالها فيها بلاكة ....
و طلعت راسها تخزرلو : مرسي على معاونتك بصح المرة الجاية ماتسبش قدام طفلة تسمى قلة ادب
آصف شاف مليح و قعد يسمع و منبعد بدا يضحك : هههه بلا مزية رجعتلك تاع البارح
ضيقت عينيها : امم قصدك جنبي لي ڨلعتو معليش ايا ليلتك زينة و اهههه سنيوتي وقتاش ناوي يرجعها علوش
خزرلها بتعجب ديجا ولى علوش .... دار يتمشى و يحكي بالقفى : كي تتلقاي علوش قوليلو .... و هي بقات تتبسم .... مشية الغطرسة حاجة اساسية فيه ... بصح جاست تاع اليوم خلاه يكبر في عينها بجزء بسيط ..... معناها هو يحب يخبيي ... معليش جازوا 3 ايام برك مزالل لخير للقدام ....
دخلت للدار دوشت و بدلت و حكمت بلاصتها و هي تخمم فالوعد لي عطاتو لصحبتها .... حاطة هدف في راسها ... حتى و لو تزوجت غير قرايتها لي متفلتهاش ....
وصل لقا عليلو مكسل و يلعب فالتيليفون ... طبعلو رجليه و رما جسمو على الفوتاي و رخف الكرافات ....
و دار موجه كلامو ليه : اههه علوش السنيوة مولاتها تحوس عليها
عليلو بدا يضحك : ههههه اوه صباح قتلها نرجعهالك و نسيت
رفد كلاكاتو و الطباسة ... بصح مخلاهمش فارغين .... لانو عيب ... عمر الطباسة و السنيوة بشتى الفواكه و غطاهم و راح للدار
هاداك وين غفات سمعت دقديق... زعما شكون تقعدت و طلت من تاقتها .... شافت جسد جهامة و شاد سنيوة عرفاتو علوش .... راحت لباباها باش يحل ....
حللو باباها : اهلاا وليدي غير الخير
عليلو حشم من باباها : اه غير الخير عمي جيت باش نرجعلكم سنيوتكم
حامد(باباها) : اهه
