حلقة 35
الروبة كحلة و بشرتها بيضة حليب .... بروتال هابط و بروتال طالع .... و شوية من صدرها يبان ... بقى ساكت و يبلع في ريقو .... طلعت مخبية بزااف .... و اليوم انبثق كلش على مرا وحدة .... معرفش واش يحكي تبكم ... مع انو ينكر في راسو بصح رعشة قلبو ماينكرهاش عليها .... رغبتو فيها فجأة ظهرت ....
و سبأ مزال مغمضة عينيها و شافت بلي باباها طول و محبش يرد .... حلت عينيها و قابلها آصف يخزرلها خزرة تقتل طاغية عليها الرغبة .... ماعرفتش باش تبلات .... غلقت الباب في وجهو ... و هربت تلبس حوايجهااا .... و هي تندب في حناكها .... ياما وصاها بوهاا .... حست روحها دارت حاجة غالطة .... حاجة حرام .... حكمتها البكية و الرعشة ... و راحت حلتلو الباب و بدات تعرش بلا ماتفهم شي : متحشمش باقي تشوف فيا و ساكت اههه .... قول استري روحك قول منبعد نجي ڨول رايح غطي عينيك و اغلق عليا الباب لوكان شافنا شي حد واش يفهم اههه .... (تحكي و هي منفعلة و البكية حاكمتها .... حست روحها خانت ثقة بوهت و مها )
و هو قاعد حال فمو و ساكت .... لاول مرة في حياتو .... يتحط في موقف و يقعد مبكم مش عارف كيفاش يتعامل .... كي فاق شفل ضربو الضو ... زبط وجهو و ڨحرلها : ادا نتي لي مش فايقة و تحلي للي جات مجيش تلعبيها عليا ... و الغلطة مش غلطتي ... و لوكان كنت عارف انو نتي هنا مانجي مانحوس نشوف منظر كيفك و نفسد نهاري .... يحكي و هو مكرز منها و يحب يغفصها بصح مش عارف علاش و لا كيفاش ...
بقات ساكتة منبعد طرطقت بالبكا .... تبكي و ترعش وحدها .... تعض في شواربها من التوتر لي حكمها .... مش فاهمة شي غير انو تخمم في ثيقة والديها .... و عندو الحق الغلطة غلطتها ....
بقى يشوف فيها حتى تفلقت وحدها ... مافهم شي و لا عرف بواش تبلى ... تبكي بالصوت ... و هو بقى واقف مش عارف كيفاش يتعامل ... ماهوش الراجل لي يمسح الدموع و يواسي ... بالعكس تماما ... هو لي يجرح و مايهتمش ... بصح هي علاش غاضتو ... علاش قلبو وجعو منها و من بكاها .... مشاعر داخلة بعضها ...
جا رايح سمع صوتها الرقيق يرعش و مليان بحة البكا : سساممحنني الغغلطة غغلطتيي .... و غلقت الباب .... و بقات تبكي و نحيبها يسمع فيه .... قلبو بقى يضرب و يوجع فيه ... حاب يواسيها ... بصح عاود عفس عليه و حجرو و دار و هو يمشي بتعالي .... و مش مهتم بحد و لا عامل حساب لواحد ... للاسف هاد هو آصف مايتبدلش 😂
