حلقة 17
جا وقت الفطور و هو و صاحبو جاو رايحين ياكلو فالدار ... بصح صاحبو شاف سبأ تاكل فالعيش مع طاس تاع رايب و المطلوع سخون يشلفط ... دار و خلى صاحبو وحدو .... قعد معاها و هي دارت تشوف معاه و ضحكت : حاب تاكل
علي : هههه ادا كاين منقولش لالا
ناضت نفضت حوايجها و قاتلو اسنى هنا ... راحت و ولات رافدة سنيوة فيها زوج طباسة تاع عيش قريب يفيضو مع زوج خبزات و زوج طيسان رايب و الفاكية من جيهة .... حطتهم على طابلة تما و قاتلو : تفضل كول بالصحا و الهنا و عيط لصاحبك ياكل و ولات لبلاصتها تاكل و هي فرحانة .... حتى من لي يخدمو تما كلهم كلاو من ماكلتها و فرحانين .... الماكلة بزااف بنينة و اصيلة ... سبأ كانت عاملة حساب الفطور الوغ غفلتهن غابت واحد ساعة و نص طيبت 2 قزانات تاع عيش و خرحت الرايب و زادتلك المطلوع تخبز و تحط على طاوة يطيب
قعدت تعس فيه و تاكل ... تشوف في ردة فعلو ...
كان يحكي مع الخدامين و يشرحلهم حتى شافهم كامل خلاو خدمتهم و ماشيين يجروا ياكلو و هوما فرحانين ... حتى من صاحبو ... باعو علجال الماكلة (يبقى يسنى فيك علجال الماكلة يبيعك بيك بفاميلتك يا حبوبي 😒😒😒😒 انا وحدة نبيعك و منسناش😂😂😂😂)
توجه لوين كان قاعد و جبد الكرسي و ريح ... بقى بشوف الماكلة و يخزر لصاحبو لي ياكل و ميت بالسعادة : شكون جاب الماكلة
حط المغرفة مسح فمو : سبأ ... بصح سمحلي طيابهاا هبال ... و عمر راسك مطيبة لكامل لي راهم هنا بييي طفلة مقدية و عليها الكلام .... و كمل ياكل و هو يوحوح من سخانتو و حرورية لي فيه
كمل ماكلتو علي و هو مزال ماحط حتى شي في فمو .... تقدرو تقولو عايف مش حاب يطيح من قيمتو ... بصح في اعماق معدتو 😂😂😂 حاب برك مش حاب يعترف
دارلو علي و هو يغزرلو في ماكلتو : ياخو باش تاكل ... و اذا لالا غير جيب خليني نزيد
قحرلو باش يسكت ... نحا الفاست و طلع شوية الشوميز و رفد المغرفة و هو يتفحص في كلش ... بصح مالقى الشي ... كلش نظيف و بالطبع .... حط المغرفة في طبسي و كلى اول لقمة .... و غمض عينيه بلا مايشعر من بنة الماكلة .... ماقدرش ينكر حلاو. و لمة الماكلة .... كمل كلا حتى آخر لقمة .... و صاحبو يخزرلو و يضحك .... حاس انو هاد الطفلة باش تبدل فيه بزااف حوايج .... و اولهم غرورو
كي كملو جاتهم هي لي كانت تعس من بعيد ... رفدت السنيوة و مسحت الطابلة و دارت تغزر لآصف : صحة و دارت داخلة للدار باش تغسلهم
