حلقة 7
ناضت على 5 مبكرة على غير عادتها ... اليوم نهار الري المحوري... و الناس كلها تبكر باش تجري على رزقها .... فطرت هي و بوها و مها .... و توجهو للحقل كل حد فيهم شاد فيديه تويو و يسقي فالحقل باش يحصدو على سمانة.... و هي مخها مع حوار البارح .... زعما واش راح يدير ... هي متخافش .... بصح عباد كيما هو لازم ينخاف منهم ... ماهو عندو السلطة و المال و النفوذ .... و هي تخمم و جاتها في راسهاا حاجة تركعو و تخليه يخضع بلا مزيتو و لا يشوف ارض غير ارضهم .... تسنى فيه بالدرج و الدقيقة باش يوصل .... و سبحان الله
على تطليعة راسها شافت طنوبيلو جاية ... حفظتها بتدقيقها الصغير ... هابط و نافخ روحو قريب يطرطق عليهم .... و مع جا داخل الارض تاعهم وقفتلو فالمرصاد و يدها الصغرونة في وجهو .... طلعت على حجرة عالية باش تقابلو و مش حاشمة خلاص لا بقصرها و لا بحاجة اخرى : احبس عندك ممنوع تدخل ارضي يا ولد المدينة ..
رسم تبسيمة نص على وجهو .... و قدم طبس على وجها و هي بعدت عليه شوية : خممتي في لي قلتو البارح
تبسمت تبسيمة عريضة و ربعت يديها تستفز فيه : اكييد خممت و باش نبيعك ارضي يلزمك تنفذ شروطي يااا كاصف هههه و ضحكت و هو قعد يغزرلها و عينيه ضياقو .... خصها غير تزيد تتشرط ... حط يديه في جيابو : شرفينا بشروطك
جبدت نفس و بدات تعد فيهم و تحكي بتعالي كبير : على كلامك البارح .... شرطي الاول هو المشروع لي باش ديرو يتسمى باسمي و انا نشرف عليه معاك ..... و زوج نحبك دوك تدخل للارض هادي معايا و صباطك يبقى برااا و تعفس ترابهاا و تتحسسو بين رجليييك تعرف شمعناها ارض و ثالثا تسنى حتى يتحصد الحصاد منبعد ربيي يسهل الارض ليييك ... هاذوهوما شروطي ياااا متعلم انت
و تبسمت و غمازاتها بانو يقتلو
و هو وجهو محجر من الشوك .... راهي تشرط شرووط كبار عليها .... دار روحو شغل ماسمعهاش : معناها حابة نستعمل القوة
قربتلو تخزرلو بتحدي : معناهاا ماكش قدهااا و آسمكك غير بلوو و اشرب مااه ..
كلامهاااا خلااه يتنفض و صدرو بدا ينهج و هي قلبها باش يخرج من الفرحة و الخوف ماتعرفوش .... البدو كامل يتفرج و يتبسم معاها ... كلهم يعرفوهاا ماتسكت غير اذا باش ترد الصاع صاعين و نص .... بنت 18 مڨدية و حرة و بنت رجاللل .... واحد مايوقف في وجها و يروح هكداك بعملتو ركعت بزااف ناس ... و هادا ماهوش زايد عليهمم بريشة فوق راسو .... كيفو كيفهم ....
