Unicode Version
ဦးဝင်းမောင်ပြန်သွားပြီးနောက် နံရံအကွယ်၌ချောင်း၍နားထောင်နေသော Nwe ထွက်လာသည်။ မောင်ဖြစ်သူ၏မျက်နှာကို အကဲခတ်ကြည့်ရာ ဒေါသအရိပ်အရောင်များတွေ့ရသောကြောင့် ခဏတာငြိမ်နေလိုက်သည်။ နာရီဝက်လောက်ကြာတဲ့အထိ တိတ်ဆိတ်နေသောအခါမှ မနေနိုင်တော့ဘဲစကား စ ရသည်။
Nwe: 'မောင်လေး၊ ဘယ်လိုသဘောရလဲ?'
MHM: 'ဘာကိုလဲ မမ'
မိုးထက်မြင့်၏ ပြင်းထန်လွန်းသော အခြေအနေကြောင့် Nwe စကားပင်ထစ်သွားရသည်။
Nwe: 'ဦးဝင်းမောင်...ပြောသွားတဲ့စကားကိုလေ'
MHM: 'မမရော ဘယ်လိုထင်လဲ?'
Nwe: 'မမကတော့ တကယ်မချစ်ပဲ လက်မထပ်စေချင်ဘူး၊ အချိန်တွေကြာလာမှ နှစ်ယောက်လုံးစိတ်ပင်ပန်းနေမယ်'
MHM: 'ကျွန်တော်ကတော့ အဖေ့ရဲ့နောက်ဆုံး ဆန္ဒဆိုတာကို လိုက်လျောမယ်လို့ ဆုံးဖြတ်လိုက်ပြီ'
Nwe: 'မင်း ၊ ဝိုင်ကိုချစ်လို့လား? လက်စားချေချင်တာလေးတစ်ခုတည်းအတွက် မိန်းကလေးတစ်ယောက်ကို အသုံးမချသင့်ဘူး၊ ဒီလိုလုပ်လိုက်လို့ အဖေလည်း အသက်ပြန်ရှင်မလာနိုင်ဘူး'
MHM: 'ကျွန်တော်သိတယ်လေ၊ အဖေအသက်ပြန်ရှင်မလာနိုင်ဘူးဆိုတာကို၊ အဖေအသက်ပြန်ရှင်မလာနိုင်ရင်တောင် ဦးမင်းလွင်ရဲ့ မ်သားစုကိုတော့ ရှင်ရက်နဲ့ သေနေသလိုဘဝမျိုးရောက်အောင် ကျွန်တော်လုပ်နိုင်သေးတယ်'
Nwe: 'အငြိုးကြီးလှချည်လား မောင်လေးရယ်၊ မမလည်းအဖေ့ကိုမောင်လေးထက်မပိုရင်သာနေမယ် မောင်လေးလောက်တော့ချစ်ပါတယ်၊ ဒါပေမယ့် ကိုယ့်စိတ်အဆင်ပြေဖို့အတွက်နဲ့ သူများကိုဒုက္ခပေးဖို့တော့ တစ်ခါမှမစဉ်းစားဖူးဘူး'
Nwe ဆိုတာ ဦးမိုးဟိန်းရဲ့ တူမဖြစ်သလို မွေးစားသမီးလည်းဖြစ်သည်။ ဦးမိုးဟိန်း၏ ဇနီးနှင့် အစ်ကိုလင်မယားကားအက်ဆီးဒင့်ကြောင့် ကွယ်လွန်သွားကြသည့်အချိန်မှစ၍ Nwe ကိုမွေးစားပြီး သမီးအရင်းလိုစောင့်ရှောက်ထားသည်။ Nwe အတွက်တော့ ဦးမိုးဟိန်းက ကျေးဇူးရှင်အဖေဖြစ်သည်။ ဦးမိုးဟိန်းမကွယ်လွန်ခင်တွင်လည်း မိုးထက်မြင့်အား စောင့်ရှောက်ရန် Nwe အားတဖွဖွမှာဖူးသောကြောင့် အချိန်မလွန်ခင်တားရန်ပြင်ဆင်သည်။ သို့သော်လည်း မိုးထက်မြင့်၏ ဆုံးဖြတ်ချက်မှာ ပြတ်သားခိုင်မာလွန်းနေသောကြောင့် Nwe စိတ်လျှော့လိုက်ရတော့သည်။
